ຜູ້ທີ່ມັກຫລີ້ນກອບ ເຄີຍໄດ້ສັງເກດເບິ່ງ ຫລື ບໍ່ວ່າ: ພຶດຕິກຳຂອງລູກກອບ ມົນໆ ທີ່ທ່ານເງືອດໄມ້ໄປຕີມັນ ໃຫ້ລອຍລ່ອງໄປໃນທິດທາງທີ່ຕ້ອງການນັ້ນ ສິ່ງທີ່ທ່ານໄດ້ເຫັນນັ້ນມັນເປັນພຽງ ເປືອກນອກຂອງມັນ ບັດນີ້ເຮົາລອງມາເບິ່ງໃຫ້ເລິກທັງຂໍ້ດີ ແລະ ຂໍ້ບໍ່ດີຂອງມັນກັນກ່ອນວ່າ ຄຸນສົມບັດຂອງລູກກອບແນວໃດຈະໃຫ້ຄຸນປະໂຫຍດສູງສຸດ ເພື່ອໃຫ້ຄຸ້ມຄ່າຕໍ່ເງິນທີ່ເຮົາຊື້ ແລະ ເຫມາະສຳລັບຄົນທີ່ຫັດຕີໃຫມ່ ທັງຫລາຍ
ຜິວທີ່ຫຸ້ມຫໍ່ລູກກອບ ຈະເປັນໂຕກຳນົດແຮງຫມູນຂອງມັນ ເຊັ່ນ: ຖ້າຜິວນຸ້ມ ກໍ່ຈະຫມູນໄປໄດ້ຫລາຍ ເພາະພໍຫນ້າໄມ້ກອບແກ່ງມາກະທົບໃສ່ຜິວນຸ້ມຂອງລູກກອບ ດົນໆ ລູກກອບທີ່ມີຜິວແຂງ ເຊິ່ງມັນມັກຈະມື່ນພະລາດໄປເທິງ ຫນ້າໄມ້ກອບ ຖ້າຫນ້າໄມ້ກອບກະທົບລູກໄດ້ເປັນເວລາດົນ ແຮງກະທົບກໍ່ຈະປ່ຽນໄປ ເປັນແຮງແກ່ວງ ເຮັດໃຫ້ລູກກອບຫມູນໄດ້ຫລາຍຂື້ນ ຕາມລຳດັບ ລູກກອບຊະນິດນີ້ ຈຶ່ງເຫມາະສຳຫລັບຄົນທີ່ຫລີ້ນກອບລະດັບມືອາຊີບ ທີ່ມີຄວາມຕ້ອງການຕີລູກໄດ້ແບບຈັບໃສ່ ແຕ່ຖ້າບໍ່ແມ່ນອາຊີບແລ້ວ ໂອກາດຜິດພາດໃນການຕີລູກກໍ່ມີສູງ ນັ້ນຄື ອາດຈະບັງຄັບທິດທາງການລົງຂອງລູກໄດ້ຍາກ
  ສະນັ້ນຄວາມນຸ້ມ ຄວາມແຂງຂອງຜິວລູກກອບແມ່ນຂື້ນຢູ່ກັບສານເຄມີທີ່ໃຊ້ໃນການເຮັດລູກກອບ ລວມເຖິງການທີ່ຈະຕີລູກໃຫ້ໄດ້ດັ່ງໃຈນັ້ນ ຍັງມີອົງປະກອບຫລາຍຢ່າງທີ່ຕ້ອງຄຳນຶງ ເຊັ່ນ: ຊະນິດຂອງຫນ້າໄມ້ທີ່ຕີ ຊຶ່ງມີວິທີຕີທີ່ແຕກຕ່າງກັນຄື:
ຫົວເຫລັກ ຫລື ຫົວໄມ້ ສ່ວນຫລາຍນັກຕີກອບມັກຈະຕີດ້ວຍແຮງແກ່ວງ ທີ່ສຸດກຳລັງ ເຊິ່ງຈະແຕກຕ່າງຈາກ ເວດຈ໌ ທີ່ບໍ່ຕ້ອງອອກແຮງຫລາຍ ແກນໃນ ຂອງລູກກອບ ກໍ່ມີຜົນຕໍ່ການຫມູນ ຂອງລູກກອບນຳ ເຊັ່ນ: ລູກກອບທີ່ມີຜິວນຸ້ມ ຈະດູດຊຶມແຮງກະທົບ ໄດ້ດີກວ່າ ລູກກອບທີ່ມີຜິວແຂງ ແຕ່ຖ້າເຮົາຕີລູກກອບແຂງ ດ້ວຍໄມ້ຍາວ ແຮງຫມູນສະປິນຂອງລູກກອບກໍ່ຈະຫລາຍຂື້ນ ດັ່ງນັ້ນໂດຍສະຫລຸບແລ້ວ ລູກກອບທີ່ມີແກນໃນແຂງ ແລະ ຜິວນຸ້ມ ຈະຫມູນສະປິນໄດ້ຫລາຍທີ່ສຸດ ສ່ວນຊະນິດທີ່ມີແກນໃນນຸ້ມ ແຕ່ມີຜິວຫຸ້ມຫໍ່ແຂງ ຈະສະປິນໄດ້ນ້ອຍລົງ
  ຜິວທີ່ຫຸ້ມຫໍ່ ລູກກອບ ກໍ່ຈະເປັນໂຕບົ່ງບອກເຖິງ ຄວາມແຂງແຮງ, ຫມັ້ນແກ່ນ ຂອງລູກກອບນຳ, ລູກກອບຜິວນຸ້ມຈະເກີດການແຕກລ້າວ ໄດ້ໄວກວ່າ ແຕ່ຕາມທີ່ສັງເກດເບິ່ງແລ້ວ ບັນດາຄົນທີ່ຫລີ້ນກອບມືໃຫມ່ ມັກໃຊ້ລູກກອບຜິວແຂງຫລາຍກວ່າ ເພາະມີການສະປິນນ້ອຍ ຄວບຄຸມທິດທາງໄດ້ງ່າຍ ແຕ່ຕາມຄວາມເປັນຈິງແລ້ວ ບັນຫາຄວາມຄົງທົນ ຂອງລູກກອບນັ້ນ ບາດເອົາແທ້ໆ ກໍ່ບໍ່ໄດ້ເປັນປະເດັນຫລັກເລີຍ

  ແກນໃນ ຂອງລູກກອບກໍ່ມີຜົນຕໍ່ການຕີໄປໄດ້ໄກ ນັ້ນກໍ່ຍັງຂື້ນຢູ່ກັບວ່າ ທ່ານມີພື້ນຖານການຕີກອບທີ່ຖືກຕ້ອງຫລືບໍ່? ທັງວົງສະວິງ ການບິດເອວ ເພື່ອຊ່ວຍເປັນການເພິ່ມແຮງສົ່ງລູກ ດັ່ງນັ້ງ ຖ້າແກນໃນແຂງແລ້ວ ການຊຶມຊັບແຮງກະທົບກໍ່ຈະແຮງນ້ອຍ ຈຶ່ງສົ່ງຜົນໃຫ້ລູກກະເດັ່ນໄປໄດ້ໄກຫລາຍຂື້ນ ແລະ ຄວາມແຂງແຫນ້ນຫນາຂອງແກນໃນກະຍັງຂື້ນຢູ່ກັບຊະນິດຂອງວັດຖຸເຄມີ ທີ່ໃຊ້ເຮັດລວມທັງວິທີການພັນແກນໃນ ອີກນຳ
ໃນປັດຈຸບັນ ບໍລິສັດຜະລິດລູກກອບ ມີເຕັກໂນໂລຊີ ທີ່ສາມາດສ້າງສັນລູກກອບ ທີ່ຕີໄດ້ໄກເຖິງ 300 ຫລາ, ຖ້າຕີໄດ້ແບບພໍເຫມາະພໍດີ ແຕ່ມີຂໍ້ຈຳກັດ ໂດຍທາງສະມາຄົມກອບຂອງສະຫະລັດ ໄດ້ອອກ ກົດຂໍ້ບັງຄັບໃຫ້ບໍລິດສັດຜູ້ຜະລິດລູກກອບທີ່ຕີໄດ້ໄກບໍ່ເກີນ 280 ຫລາ, ຊິ່ງມີການວັດກັນດ້ວຍເຄື່ອງຕີລູກກອບ ທີ່ມີຄວາມໄວ 160 ໄມຕໍ່ຊົ່ວໂມງ ເຮັດໃຫ້ບໍລິດສັດຜູ້ຜະລິດລ້ວນພະຍາຍາມສ້າງຈຸດເດັ່ນ ຂໍ້ອື່ນໃຫ້ກັບລູກກອບຂອງໂຕເອງ ເພື່ອສ້າງແຮງຈູງໃຈໃນການຊື້ ເຊັ່ນ: ຜະລິດລູກກອບຊະນິດແກນໃນນຸ້ມ ແລະ ຜິວຫຸ້ມນຸ້ມ ສົ່ງຜົນໃຫ້ມີການສະປິນທີ່ສູງຂື້ນ..
ສ່ວນຮອຍບຸ້ມ ຈາກຜິວລູກກອບ ມີອິດທິພົນຕໍ່ການຕີໄກຫລາຍ ເພາະເວລາທີ່ລູກກອບກຳລັງຫມູນ ຢູ່ນັ້ນ ຮອຍບຸ້ມຈະອາໄສອາກາດອ້ອມໆ ໂຕມັນ ເປັນແຮງດັນໃຫ້ຟົ້ງໄປໄດ້ໄກ ສະນັ້ນ ລູກກອບທີ່ມີຮອຍບຸ້ມໃຫຍ່ ແລະ  ຕື້ນ ຈະມີວິທີທີ່ໄປໄດ້ໄກ ແລະ ບໍ່ໂດ່ງຫລາຍ ລູກກອບຜິວທີ່ລຽບຈະຕີໄດ້ໄກປະມານ 150 ຫລາ, ລວມທັງຍັງມີຂໍ້ເສຍອີກ ຄື: ການບໍມີແຮງຟົ້ງຂອງລູກກອບ
ນັກຟິສິກ ໃຊ້ເວລາວິເຄາະດົນສົມຄວນ ເພື່ອຈະຄົ້ນຫາຮູບຊົງຂອງຮອຍບຸ້ມ ຊະນິດໃດ ທີ່ສາມາດເຮັດໃຫ້ລູກໄປໄກ ແຕ່ໂດ່ງນ້ອຍ ຊິ່ງບໍ່ດົນຫລາຍ ພວກເຂົາກໍ່ໄດ້ຂໍ້ສະຫລຸບວ່າ: ຄວນຈະມີຮອຍບຸ້ມນ້ອຍ ແລະ ມີແກນໃນແຂງຫນ້ອຍນື່ງ ແຕ່ກໍມີຂໍ້ຈຳກັດວ່າ: ຮອຍບຸ້ມນັ້ນຈະຕັ້ງຢູ່ບໍລິເວນເສັ້ນຜ່າໃຈກາງຂອງລູກ ບໍ່ໄດ້ ເນື່ອງຈາກຍັງບໍ່ມີເຄື່ອງຫລໍ່ຊະນິດໃດໆ ທີ່ສາມາດເຊື່ອມລູກກອບໃຫ້ມີຄວາມມົນກົມ ລວມທັງການເລັມເສດສ່ວນຂອງວັດຖຸທີ່ເຫລືອອອກໄດ້ຫມົດ ຈາກຮອຍບຸ້ມເຄິ່ງກາງ ຈົນເຖິງປັດຈຸບັນບໍລິສັດທີ່ຜະລິດລູກກອບ ກໍຍັງພະຍາຍາມຄິດແບບລວດລາຍຂອງຮອຍບຸ້ມທີ່ດີທີ່ສຸດອອກມາ ໄວໆ ນີ້.
  ຄຸນສົມບັດຂອງລູກກອບກໍ່ຍັງຂື້ນຢູ່ກັບວິທີການຜະລິດລູກກອບນຳ ຊຶ່ງຂັ້ນຕອນໃນການຜະລິດຂອງຫລາຍບໍລິສັດ ຍັງມີຮູບແບບການຜະລິດທີ່ແຕກຕ່າງກັນອອກໄປ ທາງດ້ານວັດຖຸດິບໃນການຜະລິດກໍ່ຍັງມີປັດໄຈທີ່ສຳຄັນຄືກັນ
ຄຸນນະພາບຂອງລູກກອບທີ່ມີຢູ່ຫລາຍຍີ່ຫໍ້ ຕາມຕະຫລາດ ໃນປັດຈຸບັນນີ້ລ້ວນແຕ່ມີຄຸນສົມບັດທີ່ດີເດັ່ນແຕກຕ່າງກັນ ນັ້ນກໍ່ຂື້ນກັບວ່າທ່ານມັກແບບໃດ ແລະ ມີຄວາມຖະນັດໃນການຫລີ້ນແນວໃດ ເພາະໃນປັດຈຸບນລູກກອບທັງຈາກຄ້າຍນ້ອຍຄ້າຍໃຫຍ່ ຕ່າງໆ ລ້ວນມີການພັດທະນາຄຸນນະພາບຫລາຍຂື້ນເລື້ອຍໆ ແຕ່ມັນກໍ່ຂື້ນກັບການພິຈາລະນາຂອງທ່ານເອງໃນການເລືອກລູກກອບແບບໃດ ເພື່ອໃຊ້ໃນເວລາຄອບຄຸມ ການຕົກລົງຂອງລູກ ແຕ່ຖ້າທ່ານເປັນມືສະມັກຫລີ້ນ ກໍ່ອາດເລືອກລູກກອບທີ່ມີແຮງສະປິນນ້ອຍແຕ່ຕີໄດ້ໄກ
  ສຳຫລັບ ນັກຫລີ້ນກອບລະດັບມືອາຊີບກໍ່ສາມາດເລືອກໃຊ້ລູກກອບຫລາຍຊະນິດ ຊຶ່ງກໍ່ຂື້ນກັບສະພາບດິນຟ້າອາກາດ ສະພາບຂອງເດີ່ນ ເຊັ່ນ: ຖ້າລົມແຮງ ຄວນເລືອກໃຊ້ ລູກກອບທີ່ມີຄວາມໂດ່ງນ້ອຍ ແຕ່ກັບກິ້ງໄປໄດ້ໄກ ແຕ່ຖ້າສະຫນາມນັ້ນມີແຕ່ຫລຸມຊາຍ ຢູ່ຮອບໆ ທັງຍັງມີແຟຣ໌ເວທີ່ແຄບຫລາຍ ທ່ານອາດເລືອກໃຊ້ລູກກອບທີ່ມີແຮງໂດ່ງຫລາຍ ເພື່ອໃຫ້ລູກຕົກຢຸດ
  ທ່ານນັກກອບທັງຫລາຍ ການເລືອກໃຊ້ລູກກອບທີ່ມີຄວາມສຳພັນກັບສະໄຕການຫລີ້ນ ລວມເຖິງມີຝີມືເປັນສຳຄັນ ຫາກຍັງບໍ່ເກັ່ງ ແລະ ແຂງພໍ ບໍ່ວ່າຈະເປັນລູກກອບແບບໃດກໍ່ຄືໆກັນ ນັ້ນແຫລະ