ຖ້າຮັກບໍ່ລາບລື້ນ
ຫາທາງແກ້ໄຂແນວໃດ?
ໄດ້ຍິນມາດົນແລ້ວວ່າ:
"ການກະທຳເຫນືອກວ່າຄຳເວົ້າ" ແຕ່ຫາຂໍ້ອ້າງອິງບໍ່ໄດ້ (ໃຈຈິງຈະຂຽນວ່າ
ຫາຄົນມາອິງແອບບໍ່ໄດ້ຕ່າງຫາກ) ເພາະໃຜຢືນຢັນໄດ້ວ່າ:
ຄົນເຮົາເຮັດອັນໃດປາກກັບໃຈກົງກັນທຸກຄັ້ງໄປ ເຫັນມີແຕ່ປາກບອກຂ້ອຍຊັງເຈົ້າ ແຕ່ຍັງຊື້ຂະຫນົມນົມເນີຍມາຝາກດ້ວຍຄວາມສົງສານ
ນີ້ເພິ່ນຮຽກວ່າ:"ປາກກົງກັບພຶດຕິກຳຈົນເປັນຕາໃຫ້ລາງວັນຜູ້ມີຄວາມຊື່ສັດກັບຕົວເອງ.
ຈະວ່າໄປແລ້ວເລື່ອງປາກກັບໃຈບໍ່ກົງກັນບໍ່ແມ່ນເລື່ອງຮ້າຍແຮງອັນໃດ ແລະ
ມະນຸດທຸກເພດທຸກວັຍລ້ວນເປັນແບບນີ້ໄດ້ຫາກບໍ່ໄປສ້າງຄວາມເດືອດຮ້ອນ ໃຫ້ສັງຄົມຮອບຂ້າງ ເຖິງວ່າເຈົ້າປາກກັບໃຈບໍ່ກົງກັນພຽງໃດ
ມັນກໍ່ພຽງເລື່ອງທຳມະຊາດ ຫາກໄປເຮັດເພາະເຈດຕະນາດີແລ້ວ ເປັນຕາຊັງບ່ອນໃດ!
ກັບກັນອາດຫນ້າຮັກ (ເຫມືອນຄົນຂຽນ) ອີກດ້ວຍ.
ຈາກ Actions Speak Louder Than Words
ການກະທຳມີຄ່າກວ່າຄຳເວົ້າ ບອກວ່າ ຫລາຍຄົນຄິດວ່າການເວົ້າລົມຖືເປັນວິທີດີທີ່ສຸດ
ທີ່ຈະເຮັດໃຫ້ບຸກຄົນສອງຝ່າຍຮູ້ຈັກຊຶ່ງກັນ ແລະ ກັນດີຂື້ນ ແຕ່ຜົນການວິໄຈຂອງ ຈູເລຍ ທີ.
ວູ້ດ ແລະ ສະຕີຟ ດັຄ ເວົ້າວ່າ: ຄວາມເຂົ້າໃຈດັ່ງກ່າວຖືກຕ້ອງພຽງບາງສ່ວນ ເຫດນີ້ເຈົ້າຈຶ່ງຄວນຮຽນຮູ້ໃຫ້ຫລາຍກວ່ານີ້
ໂດຍສະເພາະຫາກປະສົງຈະເຂົ້າເຖິງຄວາມໃນໃຈຂອງຄົນທີ່ເຈົ້າຮັກ
ຂໍໃຫ້ສັງເກດລາວຈາກການສະແດງອອກດັ່ງຕໍ່ໄປນີ້ ແລ້ວຈະຕີຄວາມຫມາຍໃຫ້ຟັງວ່າລາວຕັ້ງໃຈຈະບອກອັນໃດກັບເຈົ້າ.
ຈາກການວິໄຈ ຄູ່ຫູທັງສອງສຶກສາເອົາໄວ້ພຽງ 3 ຢ່າງ ເຊັ່ນ:
* ພຶດຕິກຳທີ 1: ຫາກລາວມີມາລະຍາດໃນການຂັບລົດຫລາຍຂື້ນ ເຖິງວ່າການສັນຈອນຈະຕິດຂັດຫລາຍພຽງໃດ
ແຕ່ຍັງເຍືອກເຢັນໄດ້ ທັງທີ່ຖ້າເປັນສະໄຫມກ່ອນຕອນລາວຍັງເປັນວັຍລຸ້ນ
ຢ່າຄິດເລີຍວ່າຈະໃຈເຢັນໄດ້ເຖິງຂະຫນາດນີ້ ຄວາມຫມາຍທີ່ເປັນໄປໄດ້:
ລາວມີຄວາມອົດທົນເພິ່ມຂື້ນ, ເພາະຊີວິດບໍ່ໄດ້ມີພຽງໂຕຄົນດຽວແລ້ວ, ສິ່ງທີ່ເຈົ້າຄວນເຮັດ:
ຖ້າໂດຍສ່ວນໂຕເຈົ້າຍັງເປັນຄົນເຈົ້າອາລົມ, ຢ່າໄປລົງກັບລາວ, ແນວໃດລາວກໍ່ພະຍາຍາມໄປໃນທາງທີ່ດີຂື້ນແລ້ວ
ກໍ່ຢ່າໄປສ້າງແຮງກົດດັນໃຫ້ລາວຫັນກັບໄປເປັນຄົນຫຸນຫັນພັນແລ່ນອີກເລີຍ.
* ພຶດຕິກຳທີ 2: ເມື່ອໃດທີ່ຫລີ້ນກິລານຳກັນ ແລ້ວລາວເສຍ, ລາວງຽບເປັນຊົ່ວໂມງ,
ຄວາມຫມາຍທີ່ເປັນໄປໄດ້: ຄວາມຂັດຂ້ອງຫມອງໃຈເຖິງຈະເກິດຈາກສິ່ງນ້ອຍໆ
ຊຶ່ງບາງເທື່ອບໍ່ຄິດວ່າຈະເປັນເລື່ອງເກິດຂື້ນມາໄດ້ແຕ່ກໍ່ເປັນຈົນໄດ້ ບາງເທື່ອເຈົ້າຕ້ອງຝຶກແພ້ລາວແນ່ຈັກຫນ່ອຍ ຫລື ຢ່າຫລີ້ນກິລານຳກັນປະຈຳ ໂດຍສະເພາະຖ້າກິລານັ້ນຕັດສິນກັນດ້ວຍການແພ້
- ຊະນະ, ສິ່ງທີ່ທ່ານຄວນເຮັດ: ຢ່າເອົາຈິງເອົາຈັງກັບຜົນການແຂ່ງຂັດ
ມັນກໍ່ພຽງການຫລີ້ນຢ່າງຫນື່ງ ຫລີ້ນແລ້ວກໍ່ຈົບກັນຈະໄປສົນໃຈຢ່າງຈິງເຮັດຫຍັງ
* ພຶດຕິກຳທີ 3: ຖ້າສັງເກດວ່າ ຕອນສວຍວັນອາທິດ ລາວມັກຢູ່ກັບແມ່ຂອງລາວ ແລະ ເອົາໃຈໃສ່ທ່ານສະຫມ່ຳສະເຫມີ
ຄວາມຫມາຍທີ່ເປັນໄປໄດ້: ເຈົ້າເລືອກຄົນຮັກທີ່ຈະຢູ່ຄຽງຂ້າງໄດ້ຖືກຕ້ອງແລ້ວ,
ສິ່ງທີ່ເຈົ້າຄວນເຮັດ: ຈົ່ງດີໃຈໄວ້ ສະແດງວ່າເຈົ້າເລືອກຄົນບໍ່ຜິດດອກ
ລາວເປັນຄົນຮັກຄອບຄົວ, ບໍ່ຫວັ່ນໄຫວກັບຄວາມແກ່ເຖົ້າຂອງແມ່ຍິງ ແຕ່ຢ່າເຜີໃຫ້ລາວພົບກັບສາວເອາະໆ
ບ່ອນນີ້ຕື່ມໃຫ້ ບໍ່ໄດ້ກ່ຽວກັບງານວິໄຈແຕ່ແນວໃດເລີຍ.
ບັດນີ້ພໍເຂົ້າໃຈການສະແດງອອກທີ່ລາວບໍເຄີຍອະທິບາຍໃຫ້ເຈົ້າຟັງແນ່ບໍ?
ນອກຈາກນີ້ໃນຫນ້າເຈ້ຍດຽວກັນສ່ວນທີ່ເອີ້ນວ່າ: In Love ໃນວາລະສານ
New Woman ຍັງຂຽນເຖິງ Time to get intimate ເຖິງຍາມທີ່ຄູ່ຮັກຄວນຫາເວລາສະນິດກັນ ຫລື
ໃກ້ຊິດກັນໃຫ້ຫລາຍຂື້ນ (ອີກຈັກຄັ້ງ) ໄດ້ແລ້ວ ບໍ່ຮູ້ວ່າຈະຮູ້ສຶກກັນຫລືບໍ ເປັນຫຍັງຄວາມຮັກຈຶ່ງຄ່ອຍໆ
ຈືດຈາງເມື່ອເວລາຜ່ານໄປເລື້ອຍໆ
ປີເຕີຣ໌ ຟຣານເກິລ ຜູ້ອຳນວຍການສະຖາບັນຄອບຄົວສຶກສາ ໃນນິວຢອກ ໄດ້ເວົ້າເລື່ອງເຫລົ່ານີ້ໄວ້ວ່າ:
ຄວາມຫ່າງເຫີນເປັນສິ່ງທຳມະດາທີ່ພົບໄດ້ໃນຄູ່ຮັກທຸກຄູ່
ບາງເທື່ອອາດອາລົມເສຍໃສ່ກັນຈົນທ່ານເອງຍັງແປກໃຈວ່າ
ຈະມີເຫດການແບບນີ້ເກິດຂື້ນກັບຊີວິດຄູ່ໄດ້ອີກບໍ?
ທັງທີ່ຄຳຕອບຄື: ງ່າຍຫລາຍ ບາງຄູ່ເຖິງກັບຕ້ອງເອີ້ນວ່າ: ແຮ່ງໃກ້ຫລາຍກໍ່ແຮ່ງກັດກັນຫລາຍ
ເຫັນພາບຊັດເຈນຂື້ນຫລືບໍ? ແຕ່ບໍ່ຕ້ອງໄປເຮັດຕາມດອກເດີ້
ຖ້າວ່າຄວາມຮັກຂອງເຈົ້າລາບລື້ນດີແລ້ວ ແຕ່ຖ້າຮັກຂອງໃຜຍັງບໍ່ລາບລື້ນ ເຫດນີ້ຄົງເຖິງເວລາທີ່ຈະຫັນຫນ້າອະທິບາຍເລື່ອງຄາໃຈກັນແນ່ເດີ...
ຫາເວລາເປັນສ່ວນຕົວໃຫ້ກົງກັນ ສາເຫດຫນື່ງຂອງຄວາມຫ່າງເຫີນ
ອາດເກິດຈາກການທີ່ຄູ່ຮັກບໍ່ເຄີຍຄຳນຶງເຖິງຄວາມຕ້ອງການຂອງອີກຝ່າຍ
ບາງຄູ່ຍັງປັນຍາອ່ອນຂະຫນາດຄິດພຽງວ່າ ຢູ່ນຳກັນແລ້ວຄົງບໍ່ຈຳເປັນຕ້ອງສະວິຕອັນໃດດອກ
ທັງທີ່ຢູ່ບ້ານນຳກັນນີ້ລະ ຄວນຫາເວລາມາສະວີຕຫລາຍກ່ວາເກົ່າ ເພາະຖ້າບໍ່ຫວານລະວັງຈະກາຍເປັນໃກ້ເກືອກິນດ່າງ
ບໍ່ຮູ້ຕົວເດີ້.
ບໍ່ຄວນເອົາບັນຫາບ່ອນເຮັດວຽກມາສ້າງບັນຫາໃຫ້ຄູ່ຄອງ ຄວນແຍກກັນວ່າ
ບ້ານບໍ່ແມ່ນບ່ອນລະບາຍແຮງກົດດັນ ທີ່ເຈົ້າໄດ້ຮັບມາ ນັ້ນບໍ່ໄດ້ຫມາຍຄວາມວ່າ: ເຈົ້າຈະເວົ້າກ່ຽວກັບວຽກໃນຫ້ອງການໃຫ້ຄອບຄົວຟັງບໍ່ໄດ້
ເພາະແນວໃດຊີວິດຄູ່ກໍ່ຫມາຍເຖິງການປຶກສາຫາລືກັນຢູ່ແລ້ວ ຂໍພຽງແຕ່ເລົ່າບັນຫາໃຫຍ່ໆ ກໍພໍ
ບໍ່ຄວນຈູ້ຈີ້ຫລາຍເກີນໄປ
ຍິ້ມ ຫລື ສົ່ງສາຍຕາໃຫ້ອີກຝ່າຍພຽງວັນລະ 1 ນາທີ,
ບໍ່ແມ່ນເອົາແຕ່ລົບ ວິທີນີ້ຈະເຊື່ອມຄວາມຜູກພັນໃນທາງກັບກັນ ຖ້າເຮັດວຽກໃນຫ້ອງການດຽວກັນ
ແລ້ວຈະເປັນຕ້ອງຍິ້ມ ຫລື ສົ່ງສາຍຕາເກີນກວ່າວັນລະ 1 ນາທີ, ຈະກໍ່ບັນຫາຫລາຍກວ່າແກ້ໄຂ
ຫລືບໍ່? ຜູ້ຊ່ຽວຊານຄົງລືມວິໄຈ ຖືເປັນວຽກບ້ານກັບໄປຄິດກັນເອົາເອງເດີ້.
ສຸດທ້າຍ ປ່ຽນກິດຈະວັດຕອນແລງບໍ່ໃຫ້ຊ້ຳຊາກ
ຫມາຍເຖິງເຮັດອັນໃດຮ່ວມກັນກໍ່ໄດ້ ທີ່ບໍ່ຄືເກົ່າ ເລິ່ມຕັ້ງແຕ່ເລື່ອງເທິງຕຽງໄປຈົນເຖິງການຄວນປ່ຽນຈານເຂົ້າ
ໃຫ້ເປັນລາຍໃຫມ່ໄດ້ຫລືບໍ່? ລະອຽດລະອໍເຂົ້າໄວ້, ແຕ່ປ່ຽນໃຈພຽງຫນ້ອຍຫນື່ງ
ຄິດວ່າເຖິງແນວໃດກໍ່ເປັນຄົນທີ່ເຄີຍຮັກກັນ ແຕ່ເອ໊..... ແລ້ວເຮົາຍັງຮັກກັນຢູ່ຫລືນີ້?.
