ເຕັກນິກການລ້ຽງລູກນ້ອຍໃຫ້ມີສຸຂະພາບດີ ແລະ ແຂງແຮງ

ຫລັກການສຳຄັນໃນການຈະລ້ຽງລູກໃຫ້ມີສຸຂະພາບສົມບູນແຂງແຮງນັ້ນ ແມ່ນຢູ່ທີ່ອາຫານທີ່ມີຄຸນຄ່າ ແລະ ການອອກກຳລັງກາຍຢ່າງເຫມາະສົມ ສະນັ້ນຈະມີແນວໃດແນ່ເຮົາມາຕິດຕາມກັນໄດ້ເລີຍ ດັ່ງນີ້:

1. ເລິ່ມຕົ້ນມື້ໃຫມ່ດ້ວຍອາຫານເຊົ້າທີ່ມີຄຸນຄ່າ: ອາຫານເຊົ້າເປັນອາຫານຄາບທີ່ມີຄວາມສຳຄັນທີ່ສຸດໃນແຕ່ລະວັນ ເປັນການຕຽມຮ່າງກາຍລູກນ້ອຍໃຫ້ພ້ອມກັບການຮຽນ ສຳຫລັບພໍ່ແມ່ ທີ່ບໍ່ມີເວລາຫລາຍປານໃດ ນົມຈັກຈອກ, ຂະໜົມປັງທາງເນີຍຖົ່ວ ປິດທ້າຍດ້ວຍໝາກໄມ້ຊຳນີ້ກໍ່ພຽງພໍແລ້ວ.
2. ພະຍາຍາມໃຫ້ລູກໄດ້ເຄື່ອນໄຫວຮ່າງກາຍ: ບໍ່ວ່າຈະເປັນການແລ່ນ, ຂີ່ລົດຖີບ, ຫລື ຍ່າງຫລີ້ນ ໂດຍທ່ານຄວນຈະເຮັດກິດຈະກຳເຫລົ່ານັ້ນກັບລູກນຳ ອາດຈະໃຊ້ເວລາພຽງແຕ່ 10 ນາທີ, ຫລັງຈາກທີ່ລູກໄດ້ວຽກບ້ານແລ້ວໆກໍ່ພຽງພໍໃນແຕ່ລະວັນ ນອກຈາກນັ້ນຄວນຈະຝຶກນິໄສໃຫ້ລູກຍ່າງຂື້ນຂັ້ນໃດ ແທນການຂື້ນລິບ ຫລື ຂັນໃດເລື່ອນ, ຖ້າເປັນໄປໄດ້ຄວນຈະຈັດເວລາໃຫ້ກັບການອອກກຳລັງກາຍຂອງລູກວັນລະເຄິ່ງຊົ່ວໂມງ.
3. ກິນອາຫານວ່າງຢ່າງສະຫລາດ: ພວກຂະໝົມຕ່າງໆ ຄວນເລືອກແຕ່ສິ່ງທີ່ມີປະໂຫຍດ, ມີຄຸນຄ່າອາຫານ ເຊັ່ນ: ນົມ, ຂະໜົມປັງກອບສອດໄສ້, ຂະໜົມປັງທາເນີຍຖົ່ວ, ຫລື ແຍມໝາກໄມ້, ແຊນວິດ ເປັນຕົ້ນ.
4. ສ້າງຄວາມກະສັບກະເສັງວ່ອງໄວໃຫ້ກັບລູກ: ການອອກກຳລັງກາຍ ແລະ ການອົບອຸ່ນຮ່າງກາຍ ຈະເຮັດໃຫ້ລູກໆ ມີຄວາມແຂງແຮງວ່ອງໄວ ເວລາອອກກຳລັງກາຍ ກໍ່ຄວນຈະມີ Warm up ກັນຈັກຫນ່ອຍກ່ອນ ເມື່ອຮ່າງກາຍພ້ອມຈຶ່ງອອກກຳລັງກາຍຢ່າງຈິງຈັງ ແລະ ເມື່ອຈະເລິກກໍ່ຕ້ອງຄ່ອຍໆ ເຮັດໃຫ້ຮ່າງກາຍຜ່ອນຄາຍລົງເທື່ອລະຫນ້ອຍ ແລະ ຢ່າລືມຝຶກໃຫ້ລູກຫາຍໃຈລຶກໆ ນຳ.
5. ເລືອກອາຫານຫລາຍໆຊະນິດໃຫ້ກິນຢ່າງສົມດູນ: ໃນແຕ່ລະວັນລູກຄວນຈະໄດ້ຮັບອາຫານຫລາຍໆຢ່າງ ບໍ່ແມ່ນວ່າເດັກມັກແຮມເບີເກີ ແລະ ມັນຝັ່ງທອດ ກໍ່ປອ່ຍໃຫ້ກິນແຕ່ແນວນັ້ນຕິດໆ ກັນຫລາຍໆ ຄາບ ການກິນອາຫານຫລາຍຢ່າງທີ່ມີຄຸນຄ່າອາຫານຕ່າງກັນ ຈະເຮັດໃຫ້ຮ່າງກາຍໄດ້ຮັບອາຫານຢ່າງຄົບຫມວດໝູ່.
6. ຖ້າຕ້ອງການໃຫ້ລູກມັກກິດຈະກຳຫລືການຫລີ້ນນອກບ້ານຄວນຈະຫາໝູ່ເພື່ອນໃຫ້ລູກນຳ: ເດັກນ້ອຍໆ ຈະຮູ້ສຶກມ່ວນຊື່ນຫລາຍຖ້າຫາກມີໝູ່ເພື່ອນຫລີ້ນນຳກັນ ອາດຈະເປັນໝູ່ເພື່ອນວັຍດຽວກັນ ຫລື ສະມາຊິກໃນຄອບຄົວກໍ່ໄດ້ ຖ້າຫາກມີລູກຄົນດຽວ ໃນແຕ່ລະອາທິດຄວນຫາເວລາພິເສດ ໃຫ້ລູກໄດ້ໄປເຂົ້າກຸ່ມຫລີ້ນກັບໝູ່ເພື່ອນໃນວັຍໃກ້ຄຽງກັນນຳ.
7. ພະຍາຍາມໃຫ້ລູກໄດ້ກິນຜັກ ໝາກໄມ້: ໃນອາຫານກໍ່ຄວນຈະມີຜັກທີ່ເປັນຕາກິນໃຫ້ລູກໆ ໄດ້ກິນນຳ ເຊັ່ນ: ໃນສະປາເກດຕີ້ ກໍ່ອາດຈະໃສ່ຫມາກເລ່ນ, ໃນໄອສະຄຣີມໃສ່ກ້ວຍຫອມ, ໃສ່ໝາກໄມ້ ເພື່ອໃຫ້ລູກໄດ້ມີໂອກາດຫລາຍທີ່ສຸດໃນການກິນອາຫານຈຳພວກນີ້.
8. ພາລູກເຂົ້າຮ່ວມເກມການແຂ່ງຂັນ ຫລື ກິລາ: ການໃຫ້ໂອກາດເດັກນ້ອຍໄດ້ເຂົ້າໄປຢູ່ໃນທີມການແຂ່ງຂັນເກມ ຫລື ກິລາ ຈະເຮັດໃຫ້ເດັກນ້ອຍມີຄວາມຮູ້ສຶກທີ່ດີ ອີກທັງຍັງເຮັດໃຫ້ຮ່າງກາຍຂອງເຂົາສົມສ່ວນແຂງແຮງອີກດ້ວຍ.
9. ຈັດອາຫານແຕ່ລະຄາບໃຫ້ສົມດູນກັນ: ເຊັ່ນວ່າ ຖ້າຫາກອາຫານມື້ນີ້ ມີໄຂມັນຫລາຍແນ່ ມື້ຫນ້າກໍ່ລົດໄຂມັນລົງແນ່ຈະເປັນການດີ
10. ເຮັດໃຫ້ການກິນອາຫານ ແລະ ການເຮັດກິດຈະກຳຮ່ວມກັນນັ້ນມີຄວາມສຸກ: ບໍ່ວ່າຈະເປັນການຫລີ້ນກິລາ, ການແລ່ນເກມ ຫລື ການກິນອາຫານ ຖ້າສ້າງບັນຍາກາດທີ່ມ່ວນຊື່ນໃຫ້ກັບເດັກນ້ອຍ ເດັກຈະມີຄວາມຮູ້ສຶກມີຄວາມສຸກຕໍ່ການເຮັດກິດຈະກຳນັ້ນໆ

ຂໍ້ແນະນຳທັງ 10 ຂໍ້ນີ້: ອາດຈະເປັນປະໂຫຍດ ແລະ ຊ່ວຍເສິມສ້າງສຸຂະພາບຮ່າງກາຍໃຫ້ກັບເດັກອາຍຸ 9-15 ປີໄດ້
ຂໍ້ມູນມາຈາກ The American Dietetic Association