ເມື່ອໃດພ້ອມຈະມີລູກ

"ລູກ" ຄືດວງໃຈຂອງພໍ່ ແລະ ແມ່ ລູກເປັນສົມບັດຂອງທັງສອງຄົນ ຈຶ່ງຄວນພ້ອມກັນທັງສອງຝ່າຍກ່ອນຈະມີລູກ ຄວນພ້ອມໃນທຸກໆດ້ານ ແລະ ພ້ອມຕະຫລອດໄປ ເພື່ອການລ້ຽງດູລູກນຳ ໃນນີ້ຈະກ່າວເຖິງຄວາມພ້ອມກ່ອນຈະມີລູກ

1. ສຸຂະພາບແມ່
   ຖ້າທ່ານທີ່ຍັງຢູ່ໃນຊ່ວງວັຍລຸ້ນຍັງບໍ່ສົມຄວນຈະມີລູກ ເພາະລຳພັງຕົວທ່ານເອງຍັງມີການຈະເລີນເຕີບໃຫຍ່ອີກຫລາຍ ທ່ານຈຶ່ງຕ້ອງການອາຫານຫລາຍ ແລະ ຫລາຍຊະນິດ ຖ້າທ່ານຖືພາໃນໄລຍະນີ້ແທ້ໆ ທ່ານຈຳເປັນຕ້ອງໄດ້ຮັບການເບິ່ງແຍງທາງດ້ານອາຫານເປັນກໍລະນີພິເສດ ເພື່ອປ້ອງກັນບໍ່ໃຫ້ຮ່າງກາຍຂອງທ່ານຊຸດໂຊມຫລາຍ ແລະ ລູກທີ່ເກິດມາຈະບໍ່ແຂງແຮງ ຈຶ່ງຄວນປ້ອງກັນ ແລະ ວາງແຜນຄອບຄົວໃຫ້ດີທີ່ສຸດໃນຊ່ວງເປັນວັຍລຸ້ນ ຖ້າທ່ານມີພະຍາດປະຈຳຕົວທີ່ຍັງຢູ່ລະຫວ່າງການປິ່ນປົວ ເຊັ່ນ: ໂລກເບົາຫວານ, ໂລກຄວາມດັນໂລຫິດສູງ, ຫລື ໂລກຕ່ອຍໄທລອຍເປັນພິດ ທ່ານຄວນໄດ້ຮັບການຮັກສາຈົນສາມາດຄວບຄຸມຄວາມຜິດປົກກະຕິພາຍໃນຮ່າງກາຍໄດ້ສາກ່ອນ ຈຶ່ງຄ່ອຍເລິ່ມມີການຖືພາ ນອກຈາກນີ້ທ່ານຄວນໄປກວດສຸຂະພາບແຂ້ວ ແລ ເຫງືອກນຳ ເມື່ອພົບວ່າແຂ້ວເລິ່ມເປັນແມງ ຄວນໄດ້ຮັບການອັດຮູແຂ້ວແມງ ຫລື ຖອນອອກ ຄວນຂູດຫີນປູນທີ່ຕິດຕາມຮອບແຂ້ວ ເພື່ອປ້ອງັກນຖານແຂ້ວ ແລະ ປ້ອງກັນໂລກເຫງືອກ ຄວນກິນອາຫານທີ່ມີແຄລຊຽມຫລາຍເປັນປະຈຳ ເຊັ່ນ: ນົມ ຫລື ຜັກໃບຂຽວ ແລະ ກິນອາຫານທີ່ບຳລຸງເລືອດຢ່າງສະຫມ່ຳສະເຫມີ ເຊັ່ນ: ຕັບ, ເລືອດໝູ ແລະ ຊີ້ນ ຕ່າງໆ
2. ເວລາ ແລະ ຖານະເສດຖະກິດ
   ການທີ່ທ່ານຈະມີລູກເພິ່ມຂື້ນ 1 ຄົນ ຈະເປັນພາວະເຮັດໃຫ້ຄ່າໃຊ້ຈ່າຍພາຍໃນຄອບຄົວເພິ່ມຫລາຍຂື້ນ ຊຶ່ງຈະລວມທັງອາຫານ, ເສື້ອຜ້າ, ເຄື່ອງໃຊ້ຕ່າງໆ ແລະ ຄ່າປິ່ນປົວໃນຍາມລູກບໍ່ສະບາຍ ນອກຈາກນັ້ນຍັງຕ້ອງມີເວລາໃຫ້ແກ່ລູກນຳ ບໍ່ຄວນປະປ່ອຍໃຫ້ຄົນອື່ນເບິ່ງແຍງແທນ ບໍ່ຄວນຝາກລູກໃຫ້ບ່ອນລ້ຽງເດັກເບິ່ງແຍງ ໂດຍສະເພາະໃນໄລຍະທີ່ລູກອາຍຸໄດ້ 1 ເດືອນ, ຈົນລູກອາຍຸເກືອບຮອດ 1 ປີ ຈະເປັນຕາອິໂຕນຫລາຍ, ເພາະເດັກນ້ອຍຈະຂາດການກະຕຸ້ນທາງພັດທະນາການ, ຂາດຄວາມຮັກ ແລະ ຄວາມອົບອຸ່ນ, ບໍ່ມີຄວາມຮູ້ສຶກຂອງຄວາມເປັນ ແມ່-ລູກ ຫລື ພໍ່-ລູກ ແວວຕາຂອງເດັກນ້ອຍເຫລົ່ານີ້ບໍ່ບົ່ງບອກເຖິງການມີຄວາມສຸກຄືກັບຄົນອື່ນເລີຍ ເຫັນໃຜກໍ່ຢາກໃຫ້ອຸ້ມ, ກິນອາຫານ ແລະ ນົມບໍ່ເກັ່ງ ມີການຈະເລີນເຕີບໃຫຍ່ ແລະ ພັດທະນາການຕ່າງໆ ຊ້າ ສະຫມອງຈະນ້ອຍກວ່າເດັກນ້ອຍທົ່ວໄປ ດັ່ງນັ້ນເວລາຂອງທ່ານທີ່ໃຫ້ແກ່ລູກຈຶ່ງມີຄວາມສຳຄັນຫລາຍກວ່າເງິນຫລາຍ ແຕ່ຄົນສ່ວນໃຫຍ່ເລືອກທີ່ຈະຫາເງິນໃຫ້ຫລາຍໄວ້ກ່ອນ ໂດຍເອົາເງິນສ່ວນທີ່ຫາມາໄດ້ຈ້າງຄົນອື່ນລ້ຽງລູກແທນ ເມື່ອປຽບທຽບກັບອີກຄອບຄົວໜື່ງ ທີ່ແມ່ລາອອກຈາກວຽກມາລ້ຽງລູກດ້ວຍຕົນເອງ ເດັກນ້ອຍເຫລົ່ານີ້ຈະມີສຸຂະພາບຈິດດີ, ຄອບຄົວມີຄວາມເບິກບານມ່ວນຊື່ນ ແລະ ມີຄວາມອົບອຸ່ນຫລາຍກວ່າ.
   ດັ່ງນັ້ນເມື່ອທ່ານມີສຸຂະພາບ ແລະ ມີເວລາສຳຫລັບລູກແລ້ວ ໂດຍບໍ່ມີຫນີ້ສິນຫລວງຫລາຍ ກໍ່ຄວນຈະເລີ່ມມີລູກໄດ້.