ເມື່ອໃດຈະມີລູກຄົນທີສອງ

ຄວາມພ້ອມຂອງຝ່າຍຊາຍ ແລະ ຝ່າຍຍິງ ມີສ່ວນສຳຄັນຫລາຍໃນການຕັດສິນໃຈທີ່ຈະມີລູກຄົນທີສອງ ຢ່າລືມວ່າລູກຄົນທຳອິດຍັງເປັນເດັກນ້ອຍ ຍັງຕ້ອງການຄວາມຮັກ ແລະ ຄວາມເອົາໃຈໃສ່ຢ່າງຕໍ່ເນື່ອງ ດັ່ງນັ້ນກ່ອນທີ່ທ່ານຈະມີລູກຄົນທີສອງ ທ່ານຄວນໝັ້ນໃຈວ່າການມີລູກຄົນທີສອງຈະບໍ່ມີຜົນກະທົບຕໍ່ການລ້ຽງດູລູກຄົນທີຫນື່ງ ມີຫລາຍເທື່ອທີ່ພໍ່ ຫລື ແມ່ຂອງເດັກນ້ອຍມາເລົ່າໃຫ້ຟັງວ່າ "ລູກຄົນທີຫນື່ງນີ້ດື້ຫລາຍ ເຄີຍຊ່ວຍຕົວເອງໄດ້ຫລາຍຢ່າງ ດຽວນີ້ເຮັດຫຍັງບໍ່ໄດ້" ຫລື "ລູກຄົນທີ່ຫນື່ງຫັນກັບມາດູດເຕົ້ານົມອີກ" ຄວາມເປັນຈິງແລ້ວຈະມີລູກຄົນທີ່ສອງເມື່ອໃດກໍ່ໄດ້ ຖ້າທ່ານເຂົ້າໃຈຄວາມຮູ້ສຶກຂອງລູກຄົນທີຫນື່ງ ມີເວລາໃຫ້ແກ່ລູກຄົນທຳອິດ ແລະ ໃຫ້ການເບິ່ງແຍງເທົ່າກັນ ແຕ່ໃນທາງປະຕິບັດແລ້ວເຮັດໄດ້ຍາກ ເພາະເວລາທີ່ອຸ້ມນ້ອງ ຜູ້ເປັນອ້າຍຫລືເອື້ອຍກໍ່ຢາກໃຫ້ອຸ້ມ ທ່ານອາດຈະອຸ້ມທັງສອງຄົນບໍ່ໄດ້ ຄົນທີ່ຫນື່ງຢາກນອນເທິງຕັກຂອງແມ່ແນ່ ຈຶ່ງຂໍເຕົ້ານົມແລ້ວມານອນເທິງຕັກແມ່ ເປັນຕົ້ນ, ບັນຫາເຫລົ່ານີ້ຈະລຸດຫນ້ອຍລົງ ຖ້າຄົນທີສອງມີອາຍຸໄດ້ 4 ປີຂະນະທີ່ໃຫ້ກຳເນິດນ້ອງ ແລະ ລະຫວ່າງຖືພາທ່ານຄວນພະຍາຍາມເວົ້າໂນ້ມນ້າວ ໃຫ້ແກ່ອ້າຍຟັງສະເຫມີວ່າຕໍ່ໄປຄອບຄົວເຮົາຈະມີອ້າຍນຳກັນ 2 ຄົນ, ໄປໃສມາໃດນຳກັນ ແລະ ເມື່ອເກີດນ້ອງອອກມາໃຫມ່ໆ ທ່ານຄວນໃຫ້ອ້າຍມາຊ່ວຍເບິ່ງແຍງນ້ອງແນ່ ຈະເຮັດໃຫ້ຜູ້ເປັນອ້າຍຮູ້ສຶກວ່າຕົວເອງໃຫຍ່ຂື້ນ ມີຫນ້າທີ່ຕ້ອງຊ່ວຍເບິ່ງນ້ອງແນ່ ທ່ານອາດຈະເວັ້ນການມີລູກຄົນທີ່ສອງເມື່ອລູກຄົນຫນື່ງອາຍຸໄດ້ 1-3 ປີ, ທັງນີ້ເພາະເດັກນ້ອຍໃນອາຍຸຊ່ຳນີ້ມັກຈະມີນິໄສອິດສາ ແລະ ດື້ເປັນທຳມະດາຢູ່ແລ້ວ ຖ້າຜ່ານພົ້ນໄລຍະນີ້ໄດ້ ບັນຫາເລື່ອງນ້ອງຄົງຈະນ້ອຍລົງ ແຕ່ທັງຫມົດນີ້ຍັງຂື້ນກັບອຸປະນິໄສສ່ວນຕົວຂອງອ້າຍເປັນສຳຄັນ ຊຶ່ງອຸປະນິໄສສ່ວນຕົວນີ້ຖ່າຍທອດທາງກຳມະພັນ ເດັກນ້ອຍບາງຄົນດີຕັ້ງແຕ່ກຳເນີດ ຫລື ບາງຄົນກໍ່ດື້ມາແຕ່ກຳເນິດຄືກັນ ທ່ານຈຶ່ງຫມັ່ນສັງເກດອຸປະນິໄສລູກນ້ອຍແຕ່ລະຄົນໆ