ການກຽມຕົວກຽມໃຈກ່ອນການໃຊ້ຊີວິດຄູ່

     ຄູ່ຮັກແຕ່ລະຄູ່ໃຊ້ເວລາເບິ່ງໃຈ ແລະ ບົ່ມຄວາມຮັກໃຫ້ສຸກງອກບໍ່ເທົ່າກັນ ບາງຄູ່ບໍ່ເຖິງປີ, ບາງຄູ່ເປັນປີ ແລະ ບາງຄູ່ກໍ່ຫລາຍປີ ແຕ່ບໍ່ວ່າທ່ານຈະໃຊ້ເວລາຫລາຍປານໃດກໍ່ຕາມ ກ່ອນທີ່ທ່ານຈະໃຊ້ຊີວິດຄູ່ໄດ້ຜ່ານການກຽມຕົວກຽມໃຈກັນແລ້ວຫລືຍັງ?
ທ່ານຄົງສົງໄສແລ້ວເນາະວ່າ: ພຽງຮັກກັນ, ເຂົ້າໃຈກັນ, ຮຽນຮູ້ນິໄສໃຈຄໍເຊິ່ງກັນແລະກັນຍັງບໍ່ພໍບໍ? ຈະຕ້ອງມານັ່ງກຽມຕົວກຽມໃຈໃນເລື່ອງອັນໃດອີກ.
ອັນທີ່ຈິງແລ້ວການກຽມຕົວກຽມໃຈ ເປັນເລື່ອງຂອງການຄິດແບບ "ດັກບັນຫາ" ແລະ ປູແນວທາງການໃຊ້ຊີວິດຄູ່ຮ່ວມກັນລະຫວ່າງຄົນສອງຄົນ ເອີ້ນວ່າ: ກຽມຕົວກຽມໃຈໃຫ້ພ້ອມກ່ອນຈະຮັບຮັກເປັນຄູ່ຄຽງນັ້ນເອງ ເພາະຄູ່ທີ່ມີການກຽມຄວາມພ້ອມກ່ອນຕົກລົງປົງໃຈແຕ່ງງານ ຈະປັບຕົວເຂົ້າຫາກັນເພື່ອລະລາຍ ຄວາມຂັດແຍ້ງໄດ້ໄວ ແລະ ມີແນວໂນ້ມທີ່ຈະປັບປຸງຊີວິດຄູ່ໃຫ້ດີຂື້ນເລື້ອຍໆ

ຢາກໃຫ້ທ່ານຄິດທວນຄືນວ່າ: ໄດ້ເຄີຍເວົ້າຕົກລົງກັບຄົນຮັກໃນເລື່ອງລຸ່ມນີ້ແດ່ຫລືບໍ່?

1. ເລື່ອງບ້ານ ຫລັງແຕ່ງງານແລ້ວຈະຢູ່ຮ່ວມກັນກັບຄອບຄົວເກົ່າ ຫລື ແຍກຄອບຄົວ ຈະຊື້ເຮືອນຢູ່ໃຫມ່ຫລືເຊົ່າ.
2. ເລື່ອງເງິນ ໃຜຈະເປັນຄົນຖືເງິນ ຈະເກັບໄວ້ຈັກສ່ວນ ໃຜຈະຮັບຜິດຊອບລາຍຈ່າຍອັນໃດແດ່? ລາຍຈ່າຍທີ່ຈຳເປັນໃນແຕ່ລະເດືອນມີອັນໃດແດ່? ຈະເຮັດບັນຊີລາຍຮັບ ລາຍຈ່າຍຂອງຄອບຄົວຫລືບໍ່?
3. ເລື່ອງລູກຈະມີເມື່ອໃດ ຈະຊ່ວຍກັນລ້ຽງລູກແນວໃດ?
4. ເລື່ອງເວລາ ຕົກລົງກັນໄວ້ຫລືບໍ່ວ່າ ແຕ່ລະຄົນຄວນມີເວລາໃຫ້ແກ່ກັນພຽງໃດ ມີເວລາໃຫ້ຄອບຄົວເກົ່າຂອງແຕ່ລະຝ່າຍຫລືບໍ່?
5. ເລື່ອງວຽກບ້ານ ຈະແບ່ງເບົາພາລະກັນແນວໃດ? "ເຈົ້າເປັນຄົນລີດເສື້ອຜ້າ ຂ້ອຍຈະຊັກເສື້ອຜ້າໃຫ້ເອງ" ຂ້ອຍຈະເປັນຜູ້ອອກຕະຫລາດສ່ວນ ເຈົ້າເປັນຜູ້ຄົວກິນກໍ່ແລ້ວກັນ.
6. ກຳໜົດແຜນຊີວິດໄວ້ຂ້າວໆ ຫລືບໍ່ວ່າ ຈັກປີເຮົາຈະມີລົດຂີ່ ມີບ້ານເປັນຂອງຕົວເອງ.
7. ເລື່ອງບັນຫາ "ລິ້ນກັບຟັນ ຫລື ຖ້ວຍກັບບ່ວງ" ຖ້າເກີດຂື້ນຕ້ອງລົມກັນກ່ອນ ເວົ້າກັນດ້ວຍເຫດຜົນ ຫ້າມໃຊ້ວິທີຫອບຜ້າຫອບແພກັບບ້ານ ຫລື ຫ້າມໃຈຮ້ອນຫນີຈາກບ້ານ.
8. ເລື່ອງທີ່ຕ່າງຄົນຕ່າງບໍ່ມັກຫລືທົນບໍ່ໄດ້ຄືອັນໃດ? ເປັນຂໍ້ຕົກລົງທີ່ຕ່າງຝ່າຍຈະພະຍາຍາມຫລີກລ້ຽງ ຫລື ຊ່ວຍກັນກຳຫນົດເປັນກົດຫລັກປະຈຳໃຈ.

ແລະ ເຄີຍກຽມໃຈໄວ້ຫລືບໍ່ວ່າ:

1. ເມື່ອແຕ່ງງານແລ້ວຄວາມເປັນອິດສະລະໃນການຕາມໃຈຕົວເອງຈະລົດລົງເຄິ່ງຫນຶ່ງ ຈະມີອີກຄົນເຂົ້າມາແບ່ງປັນເວລາ ແບ່ງປັນຊີວິດຮ່ວມກັນ
2. ກຽມພ້ອມທີ່ຈະມີຄວາມຮັບຜິດຊອບຕໍ່ກັນ ພ້ອມທີ່ຈະປະເຊີນກັບສິ່ງຕ່າງໆ ໂດຍບໍ່ຫວັ່ນໄຫວ
3. ກຽມໃຈທີ່ຈະຕ້ອງປ່ຽນກິດຈະກຳປະຈຳວັນ ເຊັ່ນ: ຜູ້ຊາຍທີ່ເຄີຍໄປທ່ຽວຫລີ້ນກັບໝູ່ເພື່ອນດຸໆ ເມື່ອຕອນເປັນໂສດ ກໍ່ຕ້ອງຜ່ອນລົງຫລັງຈາກແຕ່ງງານ, ຜູ້ຍິງໂສດທີ່ເຄີຍຕື່ນນອນສວຍ ກໍ່ຕ້ອງປ່ຽນມາຕື່ນແຕ່ເຊົ້າ ເພື່ອລຸກຂື້ນມາເບິ່ງແຍງອີກຝ່າຍໜື່ງ.
4. ກຽມຮັບກັບຄວາມປ່ຽນແປງທັງຝ່າຍເຮົາ ແລະ ຝ່າຍເຂົາ ຊຶ່ງເປັນເລື່ອງປົກກະຕິທີ່ມັກຈະເກີດຂື້ນ ເຊັ່ນ: ເອົາອົກເອົາໃຈກັນຫນ້ອຍລົງ ເພື່ອເມື່ອຕອນເປັນຄູ່ຮັກ ຕ່າງກໍ່ຢາກເບິ່ງແຍງກັນ ແຕ່ເມື່ອຢູ່ນຳກັນແລ້ວຕ່າງກໍ່ລໍຖ້າໃຫ້ອີກຝ່າຍມາເອົາໃຈ
5. ມອງເຫັນຂໍ້ເສຍຂອງແຕ່ລະຝ່າຍຊັດເຈນຂື້ນ ຫລາຍຂື້ນ ເພາະຢູ່ໃກ້ຊິດກັນທຸກວັນ ຕ່າງກໍ່ເຮັດຕົວຕາມສະບາຍ, ເກງອົກເກງໃຈກັນຫນ້ອຍລົງ, ເອົາແຕ່ໃຈ ບໍ່ລະມັດລະວັງໂຕ ແລະ ເປັນຕົວຂອງຕົວເອງຫລາຍກວ່າຕອນເປັນຄູ່ຮັກກັນ.
6. ຕ່າງຄົນຕ່າງເວົ້າຢ່າງອິດສະຫລະ ແລະ ປ່ອຍອາລົມຫລາຍຂື້ນ ບໍ່ລະມັດລະວັງຄືຕອນຍັງບໍ່ທັນໄດ້ແຕ່ງງານກັນ.
7. ຄວາມຫວານຊື່ນຈະລົດລົງ ເພາະມີຄວາມຮັບຜິດຊອບເຂົ້າມາແທນບ່ອນ ຄວາມຮູ້ສຶກຕື່ນເຕັ້ນເປັນສຸກເມື່ອຢູ່ໃກ້ກັນກໍ່ຈະກາຍເປັນຄວາມເຄີຍຊີນ ແລະ ຮູ້ສຶກເສີຍໆ
8. ເລີ່ມມີການພະຍາຍາມຄວບງຳ ສະແດງຄວາມເປັນເຈົ້າຂອງກັນແລະກັນຫລາຍຂື້ນ "ເຈົ້າຈະໄປໃສ? ບອກຂ້ອຍມາກ່ອນ"

ຄົນເຮົານັ້ນຄວາມປ່ຽນແປງຂອງຕົນເອງມັກຈະບໍ່ຄ່ອຍຮູ້ສຶກ ແຕ່ຈະສຶກວ່າອີກຝ່າຍປ່ຽນໄປ ເມື່ອເກິດຄວາມຮູ້ສຶກແບບນີ້ ມັກຈະເຮັດໃຫ້ເກິດຄວາມຜິດຫວັງ ບໍ່ພໍໃຈ ແລະ ນ້ອຍອົກນ້ອຍໃຈ ຫາກທຳໃຈບໍ່ໄດ້ ຄວາມຮູ້ສຶກດັ່ງກ່າວກໍ່ຈະສະສົມ ແລະ ສັ່ນຄອນໃຈທັງສອງຝ່າຍໄປເລື້ອຍໆ. ແຕ່ຖ້າມີການກຽມຕົວກຽມໃຈກັນໄວ້ກ່ອນ ເລື່ອງທີ່ຈະກາຍເປັນບັນຫາກໍ່ຈະບໍ່ເປັນບັນຫາອີກຕໍ່ໄປ ແລະ ບໍ່ເຮັດໃຫ້ເສຍຄວາມຮູ້ສຶກກັນຫລາຍ ເພາະຄາດເອົາໄວ້ວ່າແລ້ວມັນຈະເກິດຂື້ນ.

ຄູ່ຮັກທີ່ມີການກຽມຕົວກຽມໃຈ ຍ່ອມໄດ້ກຳໄລໃນການໃຊ້ຊີວິດຄູ່