ການຖືພາຄັ້ງທຳອິດ

ຖ້າກາຍມາຫລາຍວັນຂອງປະຈຳທີ່ເຄີຍມາຍັງບໍ່ມາ ທ່ານຄວນເອ໊ະໃຈໄດ້ວ່າອາດຈະເລີ່ມຖືພາ ໂດຍສະເພາະຖ້າມີເພດສຳພັນປະມານກາງຮອບເດືອນ ແລະ ບໍ່ໄດ້ຄຸມກຳເນິດໄວ້ ປະມານ 5 ວັນຫລັງການບໍ່ມາຂອງປະຈຳເດືອນ ທ່ານອາດຈະເລີ່ມມີອາການອາຈຽນ, ວິນວຽນ ແລະ ປວດເມື່ອຍຕາມຕົນໂຕເລັກຫນ້ອຍ ຕໍ່ມາຈະເລິ່ມຮູ້ສຶກວ່າເຕົ້ານົມຄັດຂືນປະມານມື້ທີ 7 ຫລັງປະຈຳເດືອນ ການກວດຍ່ຽວເພື່ອຢືນຢັນວ່າຖືພາ ຄວນເຮັດຫລັງປະຈຳເດືອນບໍ່ມາ 7 ວັນ, ແຕ່ບາງຄົນພຽງ 5 ວັນ ກໍ່ກວດໄດ້ແລ້ວ ເນື່ອງຈາກປະຈຸບັນຊຸດການກວດທົດສອບການຖືພາມີການພັດທະນາດີຂື້ນ ມີຄວາມໄວໃນການກວດຫລາຍ ແລະ ຄວນກວດເວລາເຊົ້າຫລັງຈາກຕື່ນນອນໃຫມ່ໆ ທາງທີ່ດີຄວນກວດຫລັງຂາດລະດູ 14 ວັນ ຈະໄດ້ຜົນທີ່ແນ່ນອນກວ່າ, ທ່ານສາມາດກວດຍ່ຽວດ້ວຍຕົນເອງພຽງໄປຊື້ຊຸດກວດຕາມວິທີທີ່ຂຽນແນະນຳໄວ້ ເມື່ອຮູ້ວ່າຖືພາແລ້ວ ຄວນຟ້າວໄປປຶກສາກັບແພດໝໍ ເພື່ອຝາກທ້ອງ, ກວດຮ່າງກາຍ ກວດເລືອດເບິ່ງຄວາມສົມບູນຂອງຮ່າງກາຍ ລວມທັງກວດເລືອດ ເພື່ອຫາພູມຄຸ້ມກັນສຳຫລັບໂລກຫັດເຢຍລະມັນ ໂລກຕັບອັກເສບບີ ແລະ ກວດເຊັກການຕິດເຊື້ອວ່າມີເອດສ໌ຫລືບໍ່ ຫລັງຈາກນັ້ນຄວນກິນຢາບຳລຸງ ແລະ ປະຕິບັດຕາມຄຳແນະນຳຂອງແພດໝໍ ແລະ ໄປກວດທ້ອງຕາມການນັດ ແຕ່ຖ້າມີສິ່ງຜິດປົກກະຕິຄວນໄປກ່ອນການນັດໝາຍຂອງໝໍ.