ພະນະທ່ານ ວອງກັນເຊັງ ຮອງນາຍົກລັດຖະມົນຕີ ລັດຖະມົນຕີວ່າການກະຊວງພາຍໃນແຫ່ງ ສາທາລະນະລັດ ສິງກະໂປ ພ້ອມຄະນະໄດ້ເດີນທາງມາຢ້ຽມຢາມລາວຢ່າງເປັນທາງການຕາມຄຳເຊີນຂອງພະນະທ່ານ ທອງບັນ ແສງອາພອນ ລັດຖະມົນຕີວ່າການກະຊວງປ້ອງກັນຄວາມສະຫງົບ.

 ພິທີຕ້ອນຮັບຢ່າງເປັນທາງການໄດ້ຈັດຂຶ້ນຢູ່ທີ່ກະຊວງປ້ອງກັນຄວາມສະຫງົບໃນວັນທີ 12 ມີນາ 2008 ໂດຍມີທ່ານ ທອງບັນ ແສງອາພອນ ລັດຖະມົນຕີວ່າການກະຊວງປ້ອງກັນຄວາມສະຫງົບ, ພະນະທ່ານ ເວຢາລາ ເບັນຈາມິນວິວລຽມ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ສິງກະໂປ ປະຈຳລາວ ພ້ອມດ້ວຍພະນັກງານ ຂັ້ນສູງຂອງກະຊວງປ້ອງກັນຄວາມສະຫງົບໃຫ້ການຕ້ອນຮັບຢ່າງອົບອຸ່ນ.ຫລັງຈາກນັ້ນ ຄະນະຜູ້ແທນທັງສອງຝ່າຍ ກໍ່ໄດ້ພົບປະເຮັດວຽກ ແລະ ແລກປ່ຽນຄຳຄິດເຫັນເຊິ່ງກັນ ໂດຍເນັ້ນໃສ່ບັນຫາການຮ່ວມມືໃນການຕ້ານອາຊະຍາກຳ ຂ້າມຊາດ ເປັນຕົ້ນການກໍ່ການຮ້າຍ, ອາຊະຍາກຳທາງຄອມພິວເຕີ, ການຟອກເງິນ, ການຄ້າຂາຍ ຢາເສບຕິດ ແລະ ວັດຖຸອອກລິດຕໍ່ປະສາດລວມທັງສານເຄມີຕ່າງໆ, ການປອມແປງເອກະສານເດີນທາງ ແລະ ອື່ນໆ.ຫລັງຈາກນັ້ນ ທັງສອງຝ່າຍກໍ່ໄດ້ລົງນາມໃນບົດບັນທຶກຄວາມເຂົ້າໃຈ, ຈຸດປະສົງກໍ່ເພື່ອເພີ່ມທະວີມິດຕະພາບ ແລະ ການຮ່ວມມືລະຫວ່າງ ສອງປະເທດ ເວົ້າສະເພາະສອງກະຊວງໃນຂົງເຂດການປ້ອງກັນ, ການສຶກສາ ແລະ ການຕ້ານອາຊະຍາກຳຕ່າງໆ, ການແລກປ່ຽນວິຊາການທາງດ້ານຕຳຫລວດມອດໄຟເຕັກໂນໂລຢີຂອງຕຳຫລວດ ແລະ ການຄຸ້ມຄອງການຈະລາຈອນ.

ໂອກາດຢ້ຽມຢາມລາວຄັ້ງນີ້, ຄະນະຜູ້ແທນດັ່ງກ່າວຍັງໄດ້ເຂົ້າຢ້ຽມຂຳ່ນັບພະນະທ່ານ ບົວສອນ ບຸບຜາວັນ ນາຍົກ ລັດຖະມົນຕີແຫ່ງ ສປປ ລາວ, ຢ້ຽມຢາມພື້ນຖານການຜະລິດ ແລະ ສະຖານທີ່ທ່ອງທ່ຽວວັດທະນະທຳຢູ່ນະຄອນຫລວງ ວຽງຈັນ ຫລາຍແຫ່ງໃນລະຫວ່າງການຢ້ຽມຢາມລາວ 3 ວັນ.

* ຄັດຈາກ: ຫນັງສືພິມປະຊາຊົນ, ສະບັບວັນທີ 17-03-2008