|
ໂຮງງານຜະລິດແປ້ງມັນໄດ້ກຳເນີດຂື້ນໃນ ສປປ
ລາວ ເກືອບ 3 ປີແລ້ວ ໂດຍໄດ້ເລີ່ມເຮັດການຜະລິດ
ເພື່ອສະໜອງ ແປ້ງມັນຕົ້ນໃຫ້ໂຮງງານຕ່າງໆຢູ່
ສປ ຈີນ ຕາມຄວາມຕ້ອງການຂອງຕະຫລາດ
ຜ່ານຈາກການຜະລິດທົດລອງແຕ່ປີ 2007 ມານີ້ ເຫັນວ່າຄວາມຕ້ອງການຂອງຕະຫຼາດມີຫຼາຍ
ແຕ່ການສະໜອງດ້ານວັດຖຸດິບຍັງບໍ່ທັນພຽງພໍເທື່ອ.
ທ່ານ ແສງມາລີ ແສງວັດທະນາ
ປະທານໂຮງງານຜະລິດແປ້ງມັນຕົ້ນໃຫ້ສຳພາດວ່າ:
ຄວາມຕ້ອງການແປ້ງມັນຕົ້ນໃນ
ປະເທດຈີນຈາກໂຮງງານປີໜື່ງ ເຖິງ 50 ພັນໂຕນ ແຕ່ຄວາມສາມາດຂອງໂຮງງານສະໜອງໄດ້
ພຽງ 28 ພັນໂຕນ ຕໍ່ປີເທົ່ານັ້ນ.
ຂະນະທີ່ເຄື່ອງຈັກມີຄວາມສາມາດຜະລິດໄດ້
80-100 ໂຕນຕໍ່ມື້ ແລະ
ຕ້ອງການວັດຖຸດິບມື້ໜື່ງ 200-320 ໂຕນ ເຊິ່ງ
ເຫັນໄດ້ວ່າຈຳນວນມັນຕົ້ນດິບທີ່ນຳມາປ້ອນໂຮງງານຍັງມີໜ້ອຍ
ເຊິ່ງຕ້ອງໄດ້ລະດົມປະຊາຊົນປູກຕື່ມຫລາຍພັນເຮັກຕາ
ຈິ່ງສາມາດຕອບສະໜອງຕາມຄວາມຕ້ອງການຂອງຕະຫຼາດໄດ້.
ທ່ານກ່າວອີກວ່າ: ໃນໄລຍະ 3 ປີຜ່ານມາ
ທາງບໍລິສັດໄດ້ນຳເອົາແນວພັນຈາກປະເທດຈີນ
ທີ່ມີຊື່ວ່າ ພັນມັງກອນຍົກ, ມັງກອນທອງ ແລະ
ພັນກະເສດສາດຂອງໄທມາໃຫ້ປະຊາຊົນຢູ່ແຂວງບໍລິຄຳໄຊປູກ
ໃນເນື້ອທີ່ 1.500 ເຮັກຕາ ເພື່ອ
ແກ້ໄຂໃນໄລຍະຕົ້ນ ແຕ່ປະຈຸບັນໂຮງງານໄດ້ເລີ່ມຂະຫຍາຍຄວາມຕ້ອງການ
ຈິ່ງເພີ່ມຂື້ນ. ດັ່ງນັ້ນ ປີ 2008 ນີ້
ທາງໂຮງງານໄດ້ລົງໄປລະດົມປະຊາຊົນຢູ່ 3 ເມືອງຄື:
ເມືອງຮົ່ມ, ເມືອງສັງທອງ ແລະ ເມືອງບໍລິຄັນ
ປູກລວມເນື້ອທີ່ ທັງໝົດ 5.666 ເຮັກຕາ
ສະເລ່ຍແລ້ວຖ້າຈຳນວນທີ່ການຜະລິດດັ່ງກ່າວສາມາດເກັບກ່ຽວໄດ້ທັງໝົດ
ແມ່ນຈະສະໜອງ ວັດຖຸດິບໃຫ້ໂຮງງານເທົ່າກັບ
70% ຂອງຄວາມຕ້ອງການໃນປະຈຸບັນ.
ສຳລັບວຽກງານໄລຍະຍາວເປັນຕົ້ນແມ່ນປີ 2009
ທີ່ຈະມາເຖິງນີ້ ໂຮງງານໄດ້ຕັ້ງເປົ້າຈະລະດົມປະຊາຊົນຂະຫຍາຍ
ເນື້ອທີ່ປູກໃຫ້ໄດ້ 3.000 ເຮັກຕາ.
ດ້ານສະນອງແນວພັນໃຫ້ປະຊາຊົນປູກ ທ່ານ ແສງມາລີ
ບອກວ່າ:
ທາງໂຮງງານຈະເປັນຜູ້ສະໜອງໃຫ້ພ້ອມທັງວິຊາການ
ຜູ້ໃຫ້ຄຳຊີ້ນຳໃນການປູກ ຈົນກວ່າຈະໄດ້ເກັບກູ້
ຫລັງຈາກເກັບກູ້ແລ້ວ
ຜູ້ປູກຈະໄດ້ຄືນແນວພັນໃຫ້ໂຮງງານໂດຍມີກຳນົດ
ວ່າ ພັນລຳໜື່ງໃຫ້ແທນຄືນ 8 ລຳ ເພາະວ່າລຳໜື່ງສາມາດນຳໄປປູກໄດ້
5 ຂຸມ ໂດຍສະເລ່ຍແລ້ວຂຸມໜື່ງຈະໄດ້ປະມານ 10
ລຳ ແລະ ເກັບກູ້ໄດ້ຂຸມໜື່ງຕ່ຳສຸດ 3
ກິໂລກຣາມ ປົກກະຕິແມ່ນ 5-8 ກິໂລກຣາມຕໍ່ຂຸມ.
ສະຫລຸບແລ້ວແນວພັນໃຫມ່ທີ່ໂຮງງານນຳມານີ້ແມ່ນໄດ້ຜົນຜະລິດຫລາຍໃຊ້ເວລາພຽງ
8 ເດືອນສາມາດເກັບກູ້ໄດ້ ຖ້າເປັນ
ພັນທີ່ໂຮງງານສະໜອງໃຫ້ແມ່ນຈະຮັບຊື້ໂດຍກົງໃນລາຄາ
400.000 ກີບຕໍ່ໂຕນ ສົ່ງເຖິງໂຮງງານ.
ສ່ວນເປັນພັນພື້ນເມືອງ ແມ່ນຈະໄດ້ຜ່ານຂັ້ນຕອນກວດສອບທາດແປ້ງກ່ອນ.
ພິເສດສຳລັບປະຊາຊົນຜູ້ທີ່ສົນໃຈຢາກ ປູກສາມາດ
ຕິດຕໍ່ໄດ້ກັບບໍລິສັດທຸກໄລຍະລະດູການ ເພາະວ່າພັນໃຫມ່ເຫລົ່ານີ້
ບໍ່ໄດ້ເລືອກດິນ ຫລື ລະດູການປູກ
ຍົກເວັ້ນເຂດນ້ຳຖ້ວມ, ດິນແຫ້ງແລ້ງ ເປັນຕົ້ນ.
*
ຄັດຈາກ: ຫນັງສືພິມປະຊາຊົນ, ສະບັບວັນທີ
30-05-2008 |
