ພາຍຫຼັງທີ່ໄດ້ຝຶກອົບຮົມວຽກງານຈະລາຈອນໃຫ້ແກ່ພະນັກງານ-ນັກຮົບໃນກົມກອງເປັນທີ່ຮຽບຮ້ອຍແລ້ວ
ທາງພະແນກ ຈະລາຈອນ-ມອດໄຟ ແຂວງຫຼວງພະບາງກໍໄດ້ຈັດແບ່ງກຳລັງເປັນຈຸເປັນໜ່ວຍລົງໄປປະຈຳແຕ່ລະ
ປ້ອມຍາມ ພາຍໃນຕົວເມືອງຫຼວງພະບາງ ເພື່ອປະຕິບັດໜ້າທີ່ ກວດກາ ຍວດຍານພາຫະນະ, ຕັກເຕືອນຜູ້ຂັບຂີ່
ໂດຍສະເພາະແມ່ນຜູ້ຂັບຂີ່ລົດຈັກ ໃຫ້ມີສະຕິລະວັງຕົວ ປະຕິບັດກົດລະບຽບການສັນຈອນໃຫ້ເຂັ້ມງວດ, ຖືເອກະ
ສານລົດຄົບຊຸດ, ສວມໝວກກັນກະທົບທຸກຄັ້ງເວລາຂັບຂີ່ລົດຈັກ ພ້ອມທັງຕິດປ້າຍຄຳຂວັນຕ່າງໆຕາມເສັ້ນທາງ
ຫຼວງ ຊຶ່ງມີເນື້ອໃນກ່ຽວກັບການແນະນຳໃຫ້ມີສະຕິລະວັງຕົວໃນການຂັບຂີ່ຍວດຍານພາຫະນະ ໃຫ້ມີຄວາມປອດ
ໄພແກ່ຜູ້ຂັບຂີ່ ແລະ ສັນຈອນໄປມາ ເພື່ອຫຼຸດຜ່ອນສະພາບອຸບັດຕິເຫດຕາມທ້ອງຖະໜົນຫຼວງ.

      ແຕ່ເຖິງປານນັ້ນ ກໍຍັງມີຜູ້ຝ່າຝືນຕໍ່ລະບຽບການການສັນຈອນໄປມາ, ຂາດສະຕິໃນການຂັບຂີ່ ພາໃຫ້ເກີດ
ອຸບັດຕິເຫດຂຶ້ນຈຳນວນໜຶ່ງ. ດັ່ງພະແນກ ຕຳຫຼວດຈະລາຈອນ-ມອດໄຟ ແຂວງ ຫຼວງພະບາງໄດ້ສະຫຼຸບໃນຊວງ
ບຸນປີໃໝ່ລາວ ທີ່ເທດສະບານເມືອງຫຼວງພະບາງ ມີອຸບັດຕິເຫດເກີດຂຶ້ນທັງໝົດ 13 ລາຍ. ໃນນັ້ນ ມີລົດຈັກຕຳ
ລົດຈັກ 3 ລາຍ, ລົດຈັກຕຳລົດຍົນ 4 ລາຍ, ລົດຈັກຕຳລົດຕຸກ ໆ 1 ລາຍ, ລົດຍົນ ປີ້ນເອງ 2 ລາຍ, ລົດຍົນ
ຕຳລົດຍົນ 1 ລາຍ ແລະ ລົດຖີບລົ້ມເອງ 1 ລາຍ. ມີພາຫະນະເປ່ເພ 18 ຄັນ, ໃນນັ້ນ ເປ່ເພເລັກນ້ອຍ 13 ຄັນ,
ເປ່ເພ ສົມຄວນ 5 ຄັນ, ໃຊ້ການບໍ່ໄດ້ 2 ຄັນ. ຄົນໄດ້ຮັບບາດເຈັບ 16 ຄົນ, ໃນນັ້ນ ເຈັບເລັກນ້ອຍ 11 ຄົນ, ເຈັບສົມຄວນ 3 ຄົນ, ເຈັບສາຫັດ 2 ຄົນ. ເສຍຊີວິດໃນທີ່ເກີດເຫດ 2 ລາຍ ມີ 3 ຄົນ, ຍິງ 1 ຄົນ, ຄື:

ລາຍທີ່1 ແມ່ນຊາວຈີນຊາຍ-ຍິງຂັບຂີ່ລົດຍົນປີ້ນເອງ ແລະ ລາຍທີ່ 2 ແມ່ນຈົວນ້ອຍ ລັກນຸ່ງເຄື່ອງຊີວິນ ຂີ່ລົດ
ຖີບໄປທ່ຽວຕາດກວາງຊີ ກັບມາລົດຖີບເບກບໍ່ຢູ່ລົງຄ້ອຍຕຳຫຼັກປະກັນໄພປີ້ນລົງກ້ອງທາງຫົວແຕກ ໄປບໍ່ກັບ.
ອາຊີບຜູ້ເຂົ້າຮ່ວມໃນການກະທຳຜິດມີ ພະນັກງານ 5 ຄົນ, ປະຊາຊົນ 4 ຄົນ, ນັກຮຽນ-ນັກສຶກສາ 6 ຄົນ, ຊາວຄ້າ
ຂາຍ 3 ຄົນ, ນັກທຸລະກິດ 2 ຄົນ ແລະ ໂຊເຟີລົດ 2 ຄົນ. ຮູບການລະເມີດ: ແລ່ນໄວ 5 ລາຍ, ດື່ມສິ່ງມືນ
ເມົາ 4 ລາຍ, ແຊງບໍ່ຮັບປະກັນ 2 ລາຍ ແລະ ລ້ຽວບໍ່ຮັບປະກັນ 2 ລາຍ. ລວມມູນຄ່າເສຍຫາຍເກືອບ 500
ລ້ານກວ່າ ກີບ.

      ນີ້ແມ່ນການສູນເສຍ ຊີວິດ ຊັບສິນຢ່າງໃຫຍ່ຫຼວງໃນຊວງບຸນປີໃໝ່ລາວ ພສ 2551 ຢູ່ທີ່ ຫຼວງພະບາງ,
ເຖິງວ່າໃນຄັ້ງຜ່ານມາ ກຳລັງຕຳຫຼວດ ຈະລາຈອນ ກໍໄດ້ເອົາໃຈໃສ່ໃນການອອກເຄື່ອນໄຫວກວດກາ ແລະ ຄຸ້ມ
ຄອງຄວາມປອດໄພຕາມທ້ອງຖະໜົນຫຼວງເຊັ່ນ: ກວດກາການນຳໃຊ້ລົດ, ໃບຂັບຂີ່, ເອກະສານລົດ, ສະພາບ
ເຕັກນິກລົດ, ກວດກາການໃສ່ໝວກກັນກະທົບ, ແນະນຳການໃຊ້ຍານພາຫະນະ ໃຫ້ມີຄວາມປອດໄພຕາມທ້ອງ
ຖະໜົນຫຼວງ, ຈົນເຖິງບາງຄັ້ງກໍໄດ້ກັກຄົນ ແລະ ພາຫະນະ ຍ້ອນການລະເມີດ ຕໍ່ກົດລະບຽບການຈະລາຈອນ ເຊັນ: ແລ່ນລົດໄວ ເຈົ້າໜ້າທີ່ເປົາຫວີດບໍ່ຢຸດ ໂດຍສະເພາະແມ່ນພວກໄວໜຸ່ມໄວຄະນອງ, ພາຍຫຼັງການປັບໃໝແລ້ວກໍຍັງ
ບໍ່ມີການເຂັດຫຼາບ, ຊ້ຳຕື່ມພັດຍັງມີຈິດໃຈປໍລະປັກຕໍ່ເຈົ້າໜ້າທີ່ ທຳລາຍແກ້ວປ້ອມຍາມຕາມຈຸດຕ່າງໆ
ເສຍຫາຍຢ່າງຫຼວງຫຼາຍ.

      ເພື່ອເຮັດໃຫ້ການສູນເສຍ ຊີວິດ ຊັບສິນ ຫຼຸດນ້ອຍຖອຍລົງ, ນອກຈາກເຈົ້າໜ້າທີ່ ຈະເຮັດຢ່າງຕັ້ງໜ້າແລ້ວ,
ເບື້ອງຜູ້ຂັບຂີ່ເອງ ກໍຕ້ອງຕັດສິນໃຈສູງ ໃນການເຂົ້າຮ່ວມ ການຫຼຸດຜ່ອນອຸບັດຕິເຫດ ໂດຍການຍົກສູງສະຕິລະວັງຕົວ
 ເຄົາລົບລະບຽບການຈະລາຈອນຢ່າງເຂັ້ມງວດ, ຫ້າມຂັບຂີ່ລົດໃນສະພາບມືນເມົາ, ຫ້າມແລ່ນໄວເກີນກຳນົດ,
ເວລາຂັບຂີ່ລົດຈັກຕ້ອງໃສ່ໝວກກັນກະທົບທຸກຄັ້ງ, ມີມາລະຍາດໃນການຂັບຂີ່ ແລະ ໃຫ້ອະໄພ-ໃຫ້ກຽດຊຶ່ງກັນ ແລະ ກັນ.ມີແຕ່ເຮັດໄດ້ແນວນີ້ ບັນຫາອຸບັດຕິເຫດຈິ່ງຈະຫຼຸດຜ່ອນລົງໄດ້.

* ຈາກ: ນັກຂ່າວ ປກສ ແຂວງຫຼວງພະບາງ, ສົມບູນ ແສງມົງ, ວັນທີ 18-04-2008
 

ອີງຕາມກົມຕຳຫລວດຈະລາຈອນໄດ້ລາຍງານສະຖິຕິອຸປະຕິເຫດໃນໄລຍະສະເຫລີມສະຫລອງບຸນປີໃຫມ່ລາວນັ້ນ ທົ່ວປະເທດໄດ້ມີອຸປະຕິເຫດເກີດຂຶ້ນທັງຫມົດ 197 ຄັ້ງ ໃນນັ້ນຢູ່ນະຄອນຫລວງວຽງຈັນ 62 ຄັ້ງ ເຈັບເລັກນ້ອຍ 70 ຄົນ, ສົມຄວນ 55 ຄົນ, ສາຫັດ 5 ຄົນ, ຕາຍ 3 ຄົນ, ແຂວງອຸດົມໄຊ 8 ຄັ້ງ, ເຈັບເລັກນ້ອຍ 6 ຄົນ, ສົມຄວນ 2 ຄົນ, ແຂວງຫລວງນ້ຳທາ 4 ຄັ້ງ, ເຈັບເລັກນ້ອຍ 6 ຄົນ, ແຂວງບໍ່ແກ້ວ 5 ຄັ້ງ, ເຈັບເລັກນ້ອຍ 2 ຄົນ, ຕາຍ 5 ຄົນ.

* ຄັດຈາກ: ໜັງສືພິມປະຊາຊົນ, ສະບັບວັນທີ 21-04-2008