ປັດຈຸບັນໄດ້ມີຫລາຍຫາງສຽງຂອງສັງຄົມວ່າຊີມັງລາວ ທີ່ຜະລິດຢູ່ພາຍໃນແມ່ນຂາດຕະຫລາດ ແຕ່ວ່າໂຮງງານຊີມັງ ແມ່ນເພີ່ມຂື້ນ ເລື່ອງນີ້ ທ່ານ ວັນທອງ ສິດທິກຸນ ຮອງອຳນວຍການຊີມັງລາວແຫ່ງທີ 2 ໃຫ້ສຳພາດກ່ຽວກັບຊີມັງລາວ
ຂາດຕະຫຼາດນີ້ວ່າ: ສະເພາະຢູ່ໃນນະຄອນຫຼວງວຽງຈັນ ສາເຫດຕົ້ນຕໍ ຊີມັງຂາດຕະຫຼາດກໍແມ່ນໄລຍະນີ້ເປັນໄລຍະທີ່
ປະຊາຊົນກຳລັງທຳການກໍ່ສ້າງເຮືອນ ແລະ ທີ່ພັກອາໄສຫຼາຍຂື້ນກວ່າເດືອນທີ່ຜ່ານມາ ໄປຄຽງຄູ່ກັນນີ້ ໂຄງການຂອງ
ຕ່າງປະເທດກໍຄືໂຄງການຂອງລັດຖະບານລົງທຶນ ແລະ ລູກຄ້າຂອງບໍລິສັດຊີມັງກໍສຸມໃສ່ການກໍ່ສ້າງເຊັ່ນດຽວກັນ ສະນັ້ນ ຈຶ່ງເຮັດໃຫ້ປະລິມານຄວາມຕ້ອງການຂອງລູກຄ້າ ບໍ່ພຽງພໍກັບຄວາມຕ້ອງການ ປັດຈຸບັນໂຮງງານຊີມັງຫຼັງທີ 1 ແລະ ຫຼັງທີ 2 ແມ່ນຜະລິດຊີມັງເປັນປົກກະຕິ ບໍ່ໄດ້ຂາດ ແລະ ຈຳໜ່າຍຕາມອັດຕາການຜະລິດທີ່ກຳນົດໄວ້ ສຳລັບໂຮງງານ
ຊີມັງແຫ່ງອື່ນໆນັ້ນ ໂດຍສະເພາະຢູ່ແຂວງຫຼວງພະບາງ ເຂົາເຈົ້າຜະລິດແມ່ນຮັບໃຊ້ຢູ່ທາງພາກເໜືອ ແລະ ໂຮງງານຊີມັງ
ແຫ່ງອື່ນ ກໍຮັບໃຊ້ຕາມຄວາມສາມາດຂອງຕົນທີ່ຜະລິດ.

ທ່ານ ວັນທອງ ກ່າວຕື່ມວ່າ: ເພື່ອແກ້ໄຂບັນຫາອັນຮີບດ່ວນ ແລະ ເຄັ່ງຮ້ອນນີ້ ທາງລັດຖະບານ ໂດຍສະເພາະແມ່ນ
ກະຊວງຄ້າ ກໍໄດ້ອະນຸຍາດພາກສ່ວນທີ່ກ່ຽວຂ້ອງ ໂດຍສະເພາະແມ່ນບໍລິສັດຂາອອກ-ຂາເຂົ້າ ກໍຄືຜູ້ຈຳໜ່າຍຊີມັງນີ້ ນຳເຂົ້າຊີມັງຈາກຕ່າງປະເທດມາຮັບຮອງ ຊຶ່ງໂຮງງານຊີມັງຂອງພວກເຮົານີ້ແມ່ນບໍ່ໄດ້ກັກຕຸນຊີມັງໄວ້ ເພື່ອຂື້ນລາຄາ, ຊີມັງຂອງພວກເຮົາອອກຈາກໂຮງງາງນ ແມ່ນໄດ້ສົ່ງໃຫ້ລູກຄ້າສະເພາະເລີຍ ໂດຍບໍ່ໄດ້ກັກຕຸນຊີມັງໄວ້ແຕ່ຢ່າງໃດ.

* ຄັດຈາກ: ຫນັງສືພິມວຽງຈັນໃໝ່, ສະບັບວັນທີ 18-03-2008