|
ໂດຍປະຕິບັດຕາມໃບມອບສິດ ຂອງນາຍົກລັດຖະມົນຕີ
ແຫ່ງ ສປປ ລາວ ສະບັບເລກທີ 32/ນຍ,
ລົງວັນທີ 12 ກຸມພາ 2008 ມາໃນຕອນຄ່ຳວັນທີ
24 ກຸມພາ 2008 ທີ່ສະໂມສອນຫ້ອງວ່າການປົກຄອງແຂວງສະຫວັນນະເຂດ
ໄດ້ຈັດໃຫ້ມີພິທີ ເຊັນສັນຍາພັດທະນານິຄົມອຸດສາຫະກຳ
ແລະ ການຄ້າ ລະຫວ່າງ ລັດຖະບານແຫ່ງ
ສປປ ລາວ ແລະ ບໍລິສັດ Pacifica
Streams Development Sdn.Bhd ຮ່ວມລົງນາມຕາງໜ້າຝ່າຍລັດຖະບານລາວ
ໂດຍແມ່ນທ່ານ ບົວຄຳ ສີສຸລາດ,
ຜູ້ວ່າການເຂດເສດຖະກິດພິເສດສະຫວັນ-ເຊໂນ
ແລະຕາງ ໜ້າໃຫ້ບໍລິສັດ Pacifica
Streams Development Sdn.Bhd ໂດຍທ່ານ Wai
Kok, ຜູ້ອຳນວຍການໃຫຍ່ບໍລິສັດ
Pacifica Streams Development Sdn.Bhd ໂດຍການເຂົ້າຮ່ວມເປັນສັດຂີພິຍານຂອງ
ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ,
ຜູ້ປະຈຳການລັດຖະບານ ທັງເປັນຜູ້ຊີ້ນຳເຂດເສດຖະກິດພິເສດສະຫວັນ-ເຊໂນ,
ທ່ານ ດຣ. ຈະເລີນ ເຢຍປາວເຮີ, ລັດຖະມົນຕີວ່າການກະຊວງຍຸຕິທຳ,
ທ່ານ ວິໄລວັນ ພົມເຂ, ເຈົ້າແຂວງສະຫວັນນະເຂດ,
ທ່ານລັດຖະມົນຕີຊ່ວຍ, ຮອງເຈົ້າແຂວງສະຫວັນນະເຂດ,
ເຈົ້າເມືອງ, ຫົວໜ້າພະແນກການອ້ອມຂ້າງແຂວງ
ແລະ ພະນັກງານວິຊາການທັງສອງ ຝ່າຍ.
ເນື້ອໃນຂອງສັນຍາສະບັບນີ້ ລະບຸວ່າ:
ທັງສອງຝ່າຍຈະຮ່ວມກັນພັດທະນານິຄົມອຸດສາຫະກຳ
ແລະການຄ້າໃນເນື້ອທີ່ 211 ເຮັກຕາ
ຢູ່ຕາມແລວທາງເຊື່ອມຕໍ່ແລວເສດຖະກິດ
ຕາເວັນອອກ-ຕາເວັນຕົກ, ບໍລິເວນຫຼັກ
10 ເສັ້ນທາງເລກ 9, ບ້ານໜອງເດີ່ນ ເມືອງໄກສອນ
ພົມວິຫານ ແຂວງສະຫວັນນະເຂດ ໃຫ້ເປັນເຂດນິຄົມອຸດສາຫະກຳ
ແລະ ການຄ້າ ເພື່ອຮອງຮັບການລົງທຶນຈາກພາຍໃນ
ແລະ ຕ່າງປະເທດ ເປັນຕົ້ນແມ່ນ: ຂະແໜງອຸດສາຫະກຳປະກອບມີ
ໂຮງງານ ຜະລິດແຜ່ນແພ, ເກີບ, ເຄື່ອງນຸ່ງຫົ່ມ,
ພລາສະຕິກ ແລະ ຊິ້ນສ່ວນເອເລັກໂຕຣນິກ
ຫລື IT ; ຂະແໜງການຄ້າ ປະກອບມີ: ຮ້ານຄ້າຍ່ອຍ,
ສູນການຄ້າ ແລະ ຕຶກອາຄານຕ່າງໆ ທີ່ກ່ຽວຂ້ອງກັບການຄ້າ
ແລະ ຂະແໜງບໍລິການມີ: ໂຮງຮຽນ, ໂຮງໝໍ,
ໂຮງແຮມ ແລະ ອື່ນໆ.
ໂຄງການດັ່ງກ່າວ ຈະພັດທະນາບົນພື້ນຖານຫຼັກການ
ການກໍ່ສ້າງດຳເນີນງານ ແລະ ມອບໂອນ (BOT)
ພາຍໃນກຳນົດ ເວລາ 50 ປີ ນັບແຕ່ມື້ລົງນາມໃນສັນຍາເປັນຕົ້ນໄປ,
ຫຼັງຈາກນັ້ນໂຄງການຈະຖືກມອບໂອນໃຫ້ລັດຖະບານເປັນ
ຜູ້ຄຸ້ມຄອງ ແລະ ນຳໃຊ້ຕໍ່ໄປ. ສຳລັບໂຄງການພັດທະນານິຄົມອຸດສະຫະກຳ
ແລະການຄ້າ ມີມູນຄ່າການລົງທຶນເບື້ອງ
ຕົ້ນ 13.856.500 ໂດລາສະຫະລັດ ເຊິ່ງລັດຖະບານຖືຮຸ້ນ
30% ໂດຍເອົາສິດນຳໃຊ້ທີ່ດິນປະກອບເປັນຮຸ້ນ
ແລະ ບໍລິສັດຖືຮຸ້ນ 70% ປະກອບຮຸ້ນໂດຍເງິນສົດ
ແລະ ຊັບສິນ. ການພັດທະນານິຄົມອຸດສາຫະກຳ
ແລະ ການຄ້າ ແຫ່ງ ນີ້ ຈະສາມາດຕອບສະໜອງວຽກເຮັດງານທຳ
ໃຫ້ແກ່ປະຊາຊົນລາວ ກໍຄື ປະຊາຊົນແຂວງສະຫວັນນະເຂດໄດ້ຫຼາຍກວ່າ
30.000 ຄົນ.
*
ຄັດຈາກ: ຫນັງສືພິມປະຊາຊົນ, ສະບັບວັນທີ
28-02-2008 |
