ແພດຈາກສະຖາບັນເດັກ ຈອນຫ໌ ຮອບກິ້ນສ໌ ໃນສະຫະລັດອາເມລິກາ ປະກາດເຕືອນພໍ່ແມ່ ວ່າ: ລູກນ້ອຍທີ່ມີອາຍຸຕ່ຳກວ່າ 6 ເດືອນ ບໍ່ຄວນດື່ມນ້ຳຫຼາຍເກີນໄປ ເພາະຈະເຮັດໃຫ້ສ່ຽງຕໍ່ການເກີດພາວະທີ່ ເອີ້ນວ່າ: "Water intoxication" ຫຼື ນ້ຳໃນຮ່າງກາຍຜິດປົກກະຕິ.

ເນື່ອງຈາກໄຕ (ໝາກໄຂ່ຫຼັງ) ຂອງ ແອນ້ອຍ ຍັງຈະເລີນເຕີບໂຕບໍ່ເຕັມທີ່ ການໃຫ້ເດັກອ່ອນດື່ມນ້ຳຫຼ!ຍເກີນໄປຈະເຮັດໃຫ້ຮ່າງກາຍມີໂຊດຽມ ຫຼາຍເກີນໄປ ຊຶ່ງສົ່ງຜົນຕໍ່ການເຮັດວຽກຂອງສະໝອງ, ນອກຈາກນັ້ນ ພາວະທີ່ມີນ້ຳໃນຮ່າງກາຍຫຼາຍຜິດປົກກະຕິ ຍັງສົ່ງຜົນໃຫ້ແອນ້ອຍຫງຸດ ງິດງ່າຍ, ເຊື່ອງຊຶມ ແລະ ມີອາລົມປ່ຽນແປງ, ອຸນນະພູມໃນຮ່າງກາຍຫຼຸດຕ່ຳລົງ, ເກີດອາການບວມ ຫຼື ຊັກໄດ້.

"ມັນເປັນອາການທີ່ສະແດງອອກບໍ່ຊັດເຈນ,​ ອາການທຳອິດທີ່ພໍ່ແມ່ສັງເກດໄດ້ຄື ອາການຊັກ," ດຣ. ແອນເດີຣ໌ ກ່າວເສີມ.

ດັ່ງນັ້ນ, ນ້ຳຈຶ່ງເປັນເຄື່ອງດື່ມທີ່ພໍ່ແມ່ຄວນຫຼົບຫຼິກບໍ່ໃຫ້ແອນ້ອຍກິນຫຼາຍ, ພໍ່ແມ່ ຍັງຄວນຫຼົບຫຼີກການຊົງນົມ ທີ່ຈືດເກີນໄປອີກດ້ວຍ ເພາະຈະພາໃຫ້ເປັນພາວະມີນ້ຳຫຼາຍໃນຮ່າງກາຍເຊັ່ນກັນ.

"ເມື່ອພວກເຂົາຫິວນ້ຳ ສິ່ງທີ່ພວກເຂົາຕ້ອງການດື່ມຫຼາຍກວ່ານ້ຳ ກໍຄືນົມແມ່ ຫຼື ນົມປະສົມ."

ດຣ ແອນເດີຣ໌ ກ່າວວ່າ ໃນບາງກໍລະນີທີ່ຈຳເປັນ ເຮົາກໍອາດໃຫ້ແອນ້ອຍດື່ມນ້ຳ ແຕ່ຕ້ອງໃຫ້ດື່ມໜ້ອຍໆ ເຊັ່ນ: ໃນເວລາແອນ້ອຍຖອກທ້ອງ ໃນບ່ອນທີ່ມີອາກາດຮ້ອນຫຼາຍ, ແຕ່ພໍ່ແມ່ຄວນປຶກສາກັບແພດກ່ອນ. ຖ້າຄິດວ່າ ລູກອາດມີພາວະນ້ຳໃນຮ່າງກາຍຜິດປົກກະຕິ ໃຫ້ພາລູກໄປພົບແພດໂດຍດ່ວນ.

* ຄັດຈາກ: ວາລະສານອັບເດດ,​ ສະບັບທີ 13, 2009 (ໜ້າທີ 40)