ວິທະຍາໄລສາທາລະນະສຸກ ມີພະນັກງານທັງຫມົດ 81 ຄົນ, ແບ່ງອອກເປັນ 4 ພະແນກການ ມີພະແນກຫ້ອງການບໍລິຫານ, ພະແນກການເງິນ-ຄຸ້ມຄອງ, ພະແນກຈັດຕັ້ງນະໂຍບາຍ, ພະແນກບໍລິຫານວິຊາການ ທາງດ້ານວຽກງານວິຊາສະເພາະແບ່ງອອກເປັນ 2 ລະດັບຄື: ລະດັບປະລິນຍາຕີ (ຕໍ່ເນື່ອງ) ມີ 2 ຂະແຫນງ:

1. ຂະແຫນງພະຍາບານສາດ
2. ຂະແຫນງວິເຄາະການແພດ

ລະດັບອານຸປະລິນຍາ (ຊັ້ນກາງ) ມີຢູ່ 5 ຂະແຫນງຄື: ຂະແຫນງພະຍາບານເຕັກນິກ, ການຢາ, ວິທະຍາສາດ, ຄຸ້ມຄອງ, ອະນາໄມ, ກາຍຍະບຳບັດ

  ນອກນີ້ ທາງໂຮງຮຽນຍັງໄດ້ກໍ່ສ້າງສາຍພິເສດ ລະດັບອານຸປະລິນຍາ (ຊັ້ນກາງ) ຕື່ມອີກ.   ວຽກງານສິດສອນ ແລະ ກໍ່ສ້າງພະນັກງານ ໂດຍປະຕິບັດຕາມທິດທາງຫນ້າທີ່ຂອງພັກ-ລັດ ມອບຫມາຍໃຫ້ ພະນັກງານ ແລະ ບັນດາຄູອາຈານ ກໍໄດ້ເຮັດຫລ້ອນຫນ້າທີ່ວິຊາສະເພາະ ໄດ້ຕັ້ງຫນ້າຄົ້ນຄວ້າຫລັກສູດການສິດສອນ ແຕ່ງບົດສອນ ທັງພາກທິດສະດີ ແລະ ພາກປະຕິບັດຕົວຈິງໄດ້ຮັບຜົນສຳເລັດຕາມລະດັບຄາດຫມາຍ, ໃນລະດັບປະລິນຍາຕີ (ລະບົບຕໍ່ເນື່ອງ) ນັກຮຽນເຂົ້າຮຽນ ປະລິນຍາຕີ ພະຍາບານສາດລຸ້ນທີ 2 ມີຈຳນວນນັກສຶກສາທັງຫມົດ 30 ຄົນ, ຍິງ 25 ຄົນ, ຜົນການສອບເສັງຈົບຊັ້ນ ໄດ້ຮັບໃບປະກາດທັງຫມົດ 30 ຄົນ, ໃນນັ້ນ ໄດ້ກຽດນິຍົມປະເພດ 1 ມີຜູ້ດຽວ, ເປັນເພດຍິງ ຊື່ ນາງ ວຽງສະຫວັນ ຈາກໂຮງຫມໍ 150 ຕຽງ, ລະດັບອານຸປະລິນຍາ (ຊັ້ນກາງ) ຂະແຫນງການຢາມີນັກຮຽນ ທັງຫມົດ 116 ຄົນ, ຍິງ 84 ຄົນ ແບ່ງອອກເປັນ 2 ສາຍຄື: ສາຍປົກກະຕິ ລຸ້ນທີ 16, ຈຳນວນ 39 ຄົນ, ຍິງ 29 ຄົນ, ສາຍພິເສດ ລຸ້ນທີ 3 ຈຳນວນນັກຮຽນ 77 ຄົນ, ຍິງ 55 ຄົນ, ຜົນການສອບເສັງ ທັງສາຍປົກກະຕິ ແລະ ສາຍພິເສດ ສອບເສັງໄດ້ ທັງຫມົດ 113 ຄົນ ຍິງ 83 ຄົນ.

  ຂະແຫນງຄຸ້ມຄອງ ອະນາໄມລຸ້ນ 16 ມີນັກຮຽນທັງຫມົດ 43 ຄົນ, ຍິງ 28 ຄົນ, ສາມາດສອບເສັງຜ່ານໄດ້ຫມົດທຸກຄົນ ຂະແຫນງກາຍຍະບຳບັດ ລຸ້ນ 1 ສາຍພິເສດ ນັກຮຽນທັງຫມົດ 70 ຄົນ, ເປັນຍິງ 52 ຄົນ, ໃນນີ້ມີນັກຮຽນມາຈາກກອງທັບຈຳນວນ 8 ຄົນ, ຍິງ 6 ຄົນ, ມີນັກຮຽນອອກກາງປີ 2 ຄົນ, ຜົນການສອບເສັງໄດ້ທັງຫມົດ 67 ຄົນ ແລະ ຍິງ 49 ຄົນ.  ໃນລຸ້ນຮຽນແຕ່ປີ 2002-2005 ມີ 4 ຂະແຫນງການເຂົ້າຮ່ວມສອບເສັງ ເອົາໃບປະກາດມີຈຳນວນທັງຫມົດ 254 ຄົນ ສາມາດສອບເສັງຜ່ານໄດ້ 252 ຄົນ.