|
ເລີ່ມແຕ່ກາງເດືອນກັນຍາ ເຖິງເດືອນ
ຕຸລາ 2007, ນັກສຶກສາລາວ ຈຳນວນ 15 ຄົນ
ໄດ້ສຳເລັດການສຶກສາລະດັບ ປະລິນຍາໂທ
ຈາກມະຫາວິທະຍາໄລ ຮີໂລຊິມາ,
ໂກເບ, ໂຕກຽວ, ລິສຸໄມກັນ ທີ່ປະເທດຍີ່ປຸ່ນ
ພາຍໃຕ້ທຶນການສຶກສາ ເຈດີເອສ JDS.
ດັ່ງນັ້ນ, ໃນວັນທີ 31 ຕຸລາ 2007ນີ້
ທາງກະຊວງສຶກສາທິການ ໄດ້ຈັດກອງປະຊຸມພົບປະນັກສຶກສາ
ປະລິນຍາໂທ ທີ່ໂຮງແຮມໂນໂວເທລ ໂດຍມີທ່ານ
ອ່ວມ ແສງຈັນດາວົງ, ຫົວໜ້າກົມແຜນການ
ແລະ ການຮ່ວມມືຕ່າງ ປະເທດ, ກະຊວງສຶກສາທິການ,
ມີຜູ້ຕ່າງໜ້າຈາກອົງການຈັດຕັ້ງ ສູນກາງ,
ສະຖານທູດຍີ່ປຸ່ນປະຈຳລາວ, ຫ້ອງການ
ໄຈກາ ປະຈຳລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນວາລະກອງປະຊຸມ
ບັນດານັກສຶກສາທີ່ສຳເລັດໃໝ່ ໄດ້ຂຶ້ນສະເໜີຜົນໄດ້ຮັບທີ່ຕົນເອງຮຽນມາ
ໂດຍອີງໃສ່ຫົວຂໍ້ ບົດວິທະຍານິພົນ
ທີ່ໄດ້ຄົ້ນຄວ້າມາກໍ່ຄືຜົນການຮຽນ
ແລະ ການນຳໃຊ້ຄວາມຮູ້ຄວາມສາມາດ
ເຂົ້າໃນແຜນພັດທະນາ ປະເທດລາວໃນອະນາຄົດ
ແລະ ໃນກອງປະຊຸມຍັງໄດ້ຈັດກຸ່ມສົນທະນາຂຶ້ນ
ລະຫວ່າງນັກສຶກສາທີ່ຈົບມາໃໝ່ ແລະ ນັກສຶກສາເກົ່າ
ເພື່ອແລກປ່ຽນຄວາມຄິດເຫັນຕ່າງໆ
ທີ່ເປັນປະໂຫຍດໃນການເຄື່ອນໄຫວໃນ ແຜນພັດທະນາ
ຄື: ຫົວຂໍ້ການຫລຸດຜ່ອນຄວາມທຸກຍາກໃນ
5 ປີຕໍ່ໜ້າ ຫາ ປີ 2020 ທີ່ຈະມາເຖິງນີ້.
ພາຍຫລັງທີ່ນັກສຶກສາ ລະດັບປະລິນຍາໂທລຸ້ນໃໝ່
ໄດ້ສຳເລັດການສຶກສາໃນສາຂາທີ່ແຕກຕ່າງກັນ
ເປັນຕົ້ນແມ່ນ ສາຂາວິຊານະໂຍບາຍລັດຖະສາດ/ການບໍລິຫານລັດ,
ເສດຖະສາດ, ບໍລິຫານທຸລະກິດ, ການສຶກສາ/ບໍລິຫານການສຶກສາ,
ພົວພັນການຕ່າງປະເທດ, ດ້ານກະສິກຳ/ການພັດທະນາຊົນນະບົດ
ແລະ ວິສະວະກຳສາດ ຊຶ່ງນັກສຶກສາທີ່ຈົບມາໃໝ່
ຈຳນວນໜຶ່ງນັ້ນ ແມ່ນຈະໄດ້ສືບຕໍ່ເຮັດວຽກຢູ່ອົງການຈັດຕັ້ງເກົ່າຂອງຕົນ
ແລະ ອີກຈຳນວນໜຶ່ງກໍພວມຊອກຫາວຽກໃໝ່
ເພື່ອຈະໄດ້ນຳເອົາປະສົບການ, ຄວາມຮູ້ຄວາມສາມາດທີ່ເກັບກ່ຽວມາໄດ້ຈາກປະເທດຍີ່ປຸ່ນນັ້ນ
ມາສ້າງສາພັດທະນາ ປະເທດຊາດໃຫ້ດີຍິ່ງຂຶ້ນ.
ໂຄງການເຈດີເອສ ໄດ້ເລີ່ມສ້າງຕັ້ງຂຶ້ນແຕ່ປີ
1999 ຫາ 2007 ເປັນໄລຍະເວລາ 8 ປີ, ມີນັກສຶກສາລາວໄດ້ຮັບທຶນ
ໄປຮຽນຕໍ່ ຢູ່ທີ່ມະຫາວິທະຍາໄລ
ທີ່ປະເທດຍີ່ປຸ່ນ ທັງໝົດຈຳນວນ 170
ຄົນ ແລະໄດ້ສຳເລັດການສຶກ ສາແລ້ວຈຳນວນ
118 ຄົນ. ສະເພາະໃນສົກປີ 2007-2008 ໂຄງການເຈດີເອສ
ຈະໄດ້ສືບຕໍ່ຄັດເລືອກເອົານັກສຶກສາລາວຈຳນວນ
25 ຄົນ, ໃນສາຂາວິຊາກົດໝາຍ, ລັດຖະສາດ/ບໍລິຫານລັດຖະສາດ,
ເສດຖະສາດ, ບໍລິຫານ ທຸລະກິດ, ການສຶກສາ/ບໍລິຫານການສຶກສາ,
ພົວພັນການຕ່າງປະເທດ, ດ້ານກະສິກຳ/ການພັດທະນາຊົນນະບົດ
ແລະ ວິສະວະກຳສາດ ເພື່ອນເປັນການປະກອບສ່ວນ
ເຂົ້າໃນການສ້າງສາພັດທະນາປະເທດລາວ
*
ຄັດຈາກ: ຫນັງສືພິມ ຂປລ, ສະບັບວັນທີ
01-11-2007 |
