ອາຫານທີ່ປຸງແຕ່ງຈາກສັດປີກທີ່ສຸກດີ ແມ່ນບໍ່ມີຄວາມສ່ຽງຕໍ່ການຕິດພະຍາດ

ຖ້າທ່ານຕ້ອງການຄົວ ຫລື ປຸງແຕ່ງອາຫານຈາກສັດປີກ, ທ່ານຕ້ອງແນ່ໃຈວ່າ ທ່ານໄດ້ຊື້ສັດປີກນັ້ນຈາກແຫລ່ງທີ່ປອດໄພ ແລະ ປະຕິບັດຕາມຂັ້ນຕອນງ່າຍໆ ດັ່ງນີ້:

* ປະຕິບັດຕາມຫລັກສຸຂະອະນາໄມ

ລ້າງມືໃສ່ສະບູ ແລະ ນ້ຳສະອາດ ຫລາຍໆຄັ້ງ ໃນເວລາ ຄົວສັດປີກ. ເອົາໃຈໃສ່ການລ້າງມືຂອງທ່ານເປັນພິເສດ ໃນເວລາທີ່ທ່ານຄົວກິນ ທັງດິບ ແລະ ສຸກ ຄວບຄູ່ກັນໄປ ແລະ ຕ້ອງລ້ານມືຂອງທ່ານ ກ່ອນ ແລະ ຫລັງ ຈັບບາຍ ສັດປີກ, ຜະລິດຕະພັນສັດປີກ ຫລື ໄຂ່ທຸກໆຄັ້ງ. ລ້າງຫນ້າໂຕະ ຫລື ສະຖານທີ່ຄົວກິນ ແລະ ເຄື່ອງໃຊ້ ຕ່າງໆໃຫ້ສະອາດດີດ້ວຍສະບູ ແລະ ນ້ຳສະອາດທຸກຄັ້ງ ຫລັງຈາກຄົວກິນ

* ສິ່ງທີ່ຄວນເອົາໃຈໃສ່ໃນການປຸງແຕ່ງສັດປີກ

	ບໍ່ຄວນໃຊ້ຂຽງ ຫລື ມີດ ພ້າ ອັນດຽວກັນ ໃນການຄົວຊີ້ນສັດປີກດິບ ກັບອາຫານທີ່ສຸກດີແລ້ວ ຫລື ຜັກຕ່າງໆ.
	ແຍກຊີ້ນສັດປີກ ໃຫ້ຫ່າງຈາກອາຫານທີ່ສຸກດີແລ້ວ ຫລື ຜັກຕ່າງໆ.
	ອາຫານທີ່ປຸງແຕ່ງຈາກສັດປີກຕ້ອງສຸກດີ. ໃຫ້ຕົ້ມ, ປີ້ງ ຫລື ຈືນ ຈົນກວ່າບໍ່ມີ ເລືອດຊືມອອກມາ.
	ບໍ່ເອົາຊີ້ນທີ່ສຸກດີແລ້ວມາວາງໃສ່ຂຽງ, ຈານ ຫລື ພາຊະນະທີ່ໄດ້ວາງຊີ້ນດິບ ມາກ່ອນນັ້ນ.

* ພິເສດໃນການປຸງອາຫານຈາກໄຂ່

ລ້າງໄຂ່ດ້ວຍນ້ຳສະບູ ກ່ອນນຳໄປເຮັດກິນ ແລະ ຫລັງຈາກນັ້ນ ຕ້ອງລ້າງມືໃສ່ສະບູໃຫ້ສະອາດດີ. ປຸງແຕ່ງໄຂ່ໃຫ້ສຸກດີ ທັງໄຂ່ແດງ ແລະ ໄຂ່ຂາວ. ບໍ່ຄວນເອົາໄຂ່ດິບປົນໃສ່ອາຫານທີ່ປຸງແຕ່ງແລ້ວ.